Կառավարական գազահեղձուկ

Ասում են, որ վերջին շրջանում ՀՀԿ-ի մեջ վախ է մտել ու տեղավորվել: Չէ, մինչ այդ էլ կար վախը, սակայն խորացել է, ասենք՝ ինչու:

Էս Կարեն Կարապետյանը վարչապետության հենց առաջին օրերից սկսեց գազիֆիկացնել կառավարությունը, ՀՀԿ-ի վախերի համար հիմքեր ստեղծվեցին. ՀՀԿ-ում արդեն խոր համոզված են, որ եթե հանկարծ ՀՀԿ-ն չհաղթի ընտրություններում, ապա գազիֆիկացումը կշարունակվի:

Մեկը լիներ՝ Կարեն Կարապետյանին հարցներ՝ պարո′ն Կարապետյան, որ այդքան շատ գազ ունեք, ինչո՞ւ էինք թաքցնում, է տայիք ժողովրդին՝ էժանանար, հա′մ հիմա ՀՀԿ-ն կլաուստրոֆոբիա չէր ունենա, հա′մ էլ արտագաղթը կկանխվեր:

Թե չէ այս ձմռան կեսին, վախը սրտում վախեցած ՀՀԿ-ականների հետ երկիրը ո՞նց է անելու: Հաստատ գիտեն, որ հայտնվելու են Հովիկ Աբրահամյանի՝ տարած, մեկ-մեկ հետ բերածի, Գագիկ Խաչատրյանի՝ կասկածելիորեն հեռացածի, Գագիկ Բեգլարյանի՝ երբեք չհեռացածի կամ Տիգրան Սարգսյանի՝ անդառնալիորեն հեռացածի կարգավիճակում:

Լավ, հիմա ի՞նչ է ապասվում Հայաստանին՝ ինտենսիվ գազիֆիկացման պայմաններում:

Կարող ենք ասել՝ նույնը, ինչ մինչև այդ ժողովուրդն էր զգում գազից: Մարդիկ բողոքում էին, որ մաքուր գազ չեն ստանում, գազի հաշվիչները խաբում են, գազն էժան առնում, թանկ վաճառում են ժողովրդին, ունևորների խավը գազի համար չի վճարում, զգուշանում էին գազի մարդուց, իսկ շրջանային գազի ղեկավարը տարածաշրջանային կալվածատիրոջ մտերիմն էր, քիթն էլ՝ անհարկի ցից-ցից:

Կարճ ասած՝ այն ամենը, ինչ զգում էր ժողովուրդը, զգալու է նաև ՀՀԿ-ն: Եվ դա է Կարեն Կարապետյանի հեղաշրջումը. բոլորը զգան միևնույնը, թե չէ՝ այսպես գազից միայն ժողովուրդն էր վախենում, քանի որ գումարած այս ամենին՝ նաև պայթում և թունավորում է մարդկանց. այժմ նաև ՀՀԿ-ն է վախենում, որ գազը կպայթի:

Ի դեպ, այս ամենը զուրկ չէ իմաստից: Երևանում ՀՀԿ գրասենյակից ոչ հեռու կառուցվել է անհիշելի ժամանակներից գազի բաշխիչ կայան, և ՀՀԿ գրասենյակի կողքով անցնելիս միշտ գազի հոտ էր գալիս: Այժմ հասկանալի է, թե ինչու. նախ գազի կայանն է կառուցվել, հետո ստեղծվել ՀՀԿ-ն:

Չի բացառվում, որ Կարեն Կարապետյանը պահանջի անդրանիկության իրավունքը:

NEWSPRESS.am