Հորս արև՝ այս անգամ չենք գողանա

Այս օրերին սահմանային իրավիճակից տեղեկանալուց հետո, երկրորդ տեղում 1000-ական դրամների հավաքագրման հարցն է:

Յուրաքանչյուրը ներկայացնում է իր տեսակետը. Ֆեյսբուքում, տանը, աշխատավայրում, քննարկումների ժամանակ: Դրա իրավունքն ունեն, քանի որ ընտանիք չկա, որ ծառայած, ծառայող կամ էլ ապագա զինվոր չունենա:

Քննարկումների մասնակիցները դեմ չեն 1000-ական դրամ վճարելուն, քննարկումների մասնակիցները հիշեցնում են, որ բանակի վրա զգալի գումարներ են ծախսվում և հատկապես վերջին տարիների բացահայտումները ցույց տվեցին, որ ոլորտում ամեն ինչ չէ, որ մաքուր է, և ի վերջո, բանակում զինծառայող ունեցող ընտանիքը յուրաքանչյուր ամիս գումար է հատկացնում իր զինվորի համար:

Քննարկումներին այսօր միացել է ՀՀ ԱԺ փոխխոսնակ Էդուարդ Շարմազանովը:

Կարող ենք նշել, որ այն պաշտոնյաները, ովքեր ըստ իրենց, լինելով առողջ մտքով և մարմնով, կարող են որևէ կառույց ղեկավարել, սակայն դարձյալ, լինելով մտքով և մարմնով առողջ՝ չեն ծառայել բանակում, նրանց խոսքն արժանահավատ հնչել հաստատ չի կարող, անգամ եթե դա «շանտղության» մասին չէ:

Շարմազանովը մոտավորապես ասում է՝ հորս արև՝ չենք գողանա այս անգամ:

Էդ. Շարմազանովն իրեն բնորոշ ոճով արդարացնում էր 1000-ական դրամների հավաքագրումը՝ հիշելով անգամ ապրիլյան օրերը, թե ինչպես էր ժողովուրդը կոպեկ-կոպեկ հավաքում բանակի համար:

Իհարկե, դա այդպես է, սակայն այն դեպքում, երբ տարբեր բարեգործական ձեռնարկներից, անհատներից տարբեր խողովակներով զգալի գումարներ են մտնում ՊՆ, այդքանից հետո ինչո՞ւ հիշեցին ժողովրդին. արդեն կասկածելի է:

Շարմազանովը միայն մոռացավ խոսել այն մասին, որ քննարկվում է նաև բանակից գումարներ կորզած անձանց պատասխանատվության ենթարկելու հարցը: Այս հարցը նա շրջանցեց:

Իհարկե, կասկածից վեր է, որ բանակի համար յուրաքանչյուրս կանենք հնարավորը, սակայն դա շահարկել և այս ձևով, երևի թե, պետք չէր: Բոլորն էլ պատրաստ են գումար տալ երկրի անվտանգության, զինծառայողների համար, սակայն միևնույն ժամանակ հիշում են բանակում չծառայածների անառարկայական խոսքերը, «բիրդան» աղա դարձածներին, բյուջեից տարբեր պատճառաբանություններով գումար կորզողներին, հանցանք գործած, սակայն պատասխանատվության չենթարկվածներին, բանակի բյուջե անտոմս ներսուդուրս անողներին:

Եվ այսքանից հետո Շարմազանովը երդվում է, որ այս անգամ չենք գողանա:

Հայկական բանակը պահելու և սատարելու պատրաստակամություն միշտ էլ կա, քանի որ հայ ընտանիքներն իրենց լավագույնն են տալիս բանակին՝ որդիներին, 1000 դրամը հաստատ կտան: Ուղղակի նվաստացուցիչ է՝ ունևորներն աղքատության մեջ ապրող ժողովրդից տանեն ևս 1000 դրամ, քանի որ իրենք արդեն այդ 1000 դրամները երկրից հանել են, իսկ ինչ էլ, որ ունեն՝ յոլա գնալու համար է:

NEWSPRESS.am