ՀՀԿ-ն առաջ էր քաշել ծանր հրետանին

Ինչո՞ւ վստահության պակաս կա հանրության շրջանում կառավարության առաջարկած ծրագրերի հանդեպ: Պատասխանն առավել քան պարզ է, յուրաքանչյուր ծրագիր ունի իր ենթատեքստը, ասել կուզի՝ կառավարությունն առանց հետին մտքի ոչինչ չի անում. ազատ, անկախ, հայրենասեր, անշահախնդիր, ազնիվ կառավարություն երևի թե չի լինում: Յուրաքանչյուր դեպքում ամեն ոք իր շահն է հետապնդում՝ հակառակորդին շրջանցելուց՝ մինչև պարզ դրամասիրություն:

Օրերս Ազգային ժողովի բարձր ամբիոնից 1000-ական դրամների վերաբերյալ իր ծանրակշիռ խոսքն ասաց ՀՀԿ պատգամավոր Շուշան Պետրոսյանը: Նախ պատգամավորը խոսում էր գրեթե հանգիստ ու գրեթե հավասարակշիռ. նա կարդում էր: Իհարկե մեկ-երկու տեղ սայթաքեց, որից պարզ դարձավ, որ նա չի գրել պատգամավորական հայենասիրապաթոսախառն ելույթը, բայց դե ոչինչ. մեր Շուշոն ա:

Սկսենք առաջին տողից՝ 1000 դրամի շուրջ բարձրացրած աղմուկը Շուշան Պետրոսյանի համար անհասկանալի է: Ինչո՞ւ է անհասկանալի: Այսօր Հայաստանում աղքատների թիվը շուրջ 1 մլն մարդ է, թերսնված երեխաների տոկոսը բարձր է. աղքատների գրպան մտնելը անհասկանալի՞ է: Լավ, Շուշան Պետրոսյանի համար անհասկանալի է:

ՀՀԿ-ական պատգամավորուհու համար ապրիլից հետո 8 ամիսը փորձություն էր:

Նշենք, որ ՀՀ անկախությունից հետո շատ տարիներ փորձություն են եղել հայ ժողովրդի համար. շրջափակում, կիսաքաղց տարիներ, անլույս ու անգազ, հացի հերթեր, 100 դրամ աշխատավարձ, պատերազմ, Հոկտեմբերի 27, Մարտի 1, ԵՄ-ից ԵԱՏՄ. ցանկը կարելի է շարունակել:

Իսկ թե անապահովներն ինչո՞ւ են գրպանները միշտ «լայն բացած», գաղտնիքը հայտնի է պատգամավորուհու ճառը գրողին. այս պարագայում Շուշան Պետրոսյանն անմեղ է: Իսկ կարճաժամկետ-երկարաժամկետ ծրագրերի վերաբերյալ այն, ինչ ճառում գրված էր, երևի հենց պատգամավորուհու համար էր հայտնություն:

Պարզվում է՝ զինվորների առջև պարտք ունենք, ուշադրությո′ւն, ժողովուրդը պարտք ունի, ոչ թե պետությունը:

Կարող ենք նշել, որ ժողովուրդը միշտ էլ աջակցել և օգնել է բանակին, պետք չէ այդ հանգամանքը անտեսել, իսկ ի՞նչ է արել պետությունը: Քանի որ կան հարցեր, որոնք բարդ են տեքստ գրողի համար, կարող ենք միայն ավելացնել, որ Շուշան Պետրոսյանի այս ելույթով 1000-ական դրամների պատմությունն ստացավ ևս մեկ հանգուցալուծում, այն է՝ նախկինում վիրավորված և զոհված զինվորների ընտանիքները ևս աջակցություն կստանան: Ուղղակի, չգիտես՝ ինչու, այս ամենն ասվեց Շուշան Պետրոսյանի անունից, երևի այլ հարմար թեկնածու, ինչքան էլ ման էին եկել, չէին գտել:

Կարճ ասած՝ Շուշոն իր գործն արեց, Շուշոն կարող է ամբիոնից իջնել: