Արտակ Շաբոյանից շ-ն է մնալու

Օրեր առաջ Տնտեսական մրցակցության պաշտպանության պետական հանձնաժողովը 110 միլիոն դրամով տուգանել էր «Երևան գարեջուր» ընկերությանը: ՏՄՊՊՀ-ն պարզել է, որ անցած տարվանից ընկերությունը յուրաքանչյուր մեկ լիտրի համար թանկացրել է իր արտադրանքը 30 դրամով, և այն դեպքում, երբ ծախսերը չեն թանկացել, երբեմն հակառակը՝ էժանացել են հումքի որոշ տեսակներ: ՏՄՊՊՀ-ն որոշել է տուգանել ընկերությանը, քանի որ ունենալով գերիշխող դիրք՝ այն չարաշահել է գերիշխող դիրքը:

Հանրությունը կարծես թե թեթև տարավ «Երևան գարեջուր» ընկերության տուգանքը, գուցե գարեջրի սիրահարներն էին զգացել 30 դրամ թանկացումը կամ էլ չէին զգացել՝ գարեջրից հետո:

Հիշեցնենք, որ ՏՄՊՊՀ-ն անկախ մարմին է, եթե Հայաստանում նման հասկացություն գոյություն ունի. ահա այդպիսին է:

Կարծ ասած՝ այսօր 110 մլն դրամի տուգանքի հարցը «սրեց» վարչապետը՝ կառավարության նիստում. նա Ա. Շաբոյանին հորդորեց հանձնաժողովի ջանքերն ուղղել առաջնային սպառում ունեցող ապրանքների շուկա, որտեղ քաղաքացիների դժգոհություններն ավելի շատ են:

Ի դեպ, հիշենք, թե ինչ ունի Արտակ Շաբոյանը, ըստ Բարձրաստիճան պաշտոնատար անձանց Էթիկայի հանձնաժողովի. ՏՄՊՊՀ նախագահը 2015 թվականին 69 միլիոն դրամով բնակարան է ձեռք բերել։

Դրամական միջոցները նախորդ տարվա սկզբում կազմել են 13 միլիոն դրամ, իսկ տարվա ավարտին՝ դարձել 23 միլիոն դրամ։ Նա 2015 թվականին եկամուտ Է ստացել ոչ միայն աշխատավարձից, այլ նաև 40 միլիոն դրամ փոխառությունից և 40,6 միլիոն դրամ օտարած անշարժ գույքից. ՏՄՊՊՀ նախագահը բազմաբնակարան շենքում ունի 4 բնակարան. մեկ շենքում 4 բնակարան:

Կինը՝ Քրիստինե Եղիազարյանն էլ նախորդ տարի 71 հազար 20 ԱՄՆ դոլար փոխառություն է տվել, որը հարկային տարվա վերջում կազմել է 84 հազար 306 դոլար։ Նրա միջոցները նախորդ տարվա սկզբի դրությամբ կազմել են 16 միլիոն դրամ և 53 հազար դոլար, որոնք տարվա վերջում դարձել են 16 միլիոն դրամ և 39 հազար դոլար։ Տրված փոխառությունների դիմաց գոյացել է նրա միակ եկամուտը, որը կազմել Է 2 հազար 700 դոլար:

Ի դեպ, Շաբոյանների բնակարաններից մեկը գտնվում է Ծարավ Աղբյուր փողոցում, որտեղ բնակարան պետք է ստանային երիտասարդ լրագրողները, բժիշկները, մանկավարժները կամ մարզիկները. Շաբոյանն այս կատեգորիաներից ոչ մեկին չի համապատասխանում:

Կարճ ասած՝ աղքատ չեն: Սակայն ինչպե՞ս է հարստացել Շաբոյանների ընտանիքը, երբ ապրում է աշխատավարձով. սա այլ հարց է:

Վերադառնանք վարչապետի դիտարկմանը՝ առաջին սպառման ապրանքների գներից հանրության դժգոհություններին «մատների արանքով» նայելուն:

Օրինակ բերենք բանանը, թեև առաջին անհրաժեշտության ապրանք չէ, սակայն տարիներ շարունակ ներկրման մենաշնորհ ուներ «Քեթրին» ընկերությունը, որը պատկանում է տխրահռչակ Միհրան Պողոսյանին. այս տարիներին ՏՄՊՊՀ-ն այդպես էլ ոչինչ չարեց այս մենաշնորհի դեմ. բանանը վաճառվում էր Քեթրինի Միհրանին սրտին հաճո գնով:

Կաթնամթերքի, հացամթերքի, շաքարավազի, բենզինի սպառման շուկաներում գերիշխող դիրք ունեցողներ կան, անգամ՝ մենաշնորհ, դարձյալ ՏՄՊՊՀ-ն ոչինչ չի արել, կամ էլ մշտապես շեշտում էր, որ հետևում է գերիշխող դիրք ունեցողների վարքագծին. նրանք կանոնավոր գերիշխում էին և չէին շեղվում՝ ըստ ՏՄՊՊՀ դիտարկման:

Այս կառույցը պետք է կանոնակարգեր մենաշնորհների խնդիրը, զսպեր չարաշահումները, սակայն արդյունքում երկրի տնտեսական կյանքում գրեթե ոչինչ չի փոխվել. Շաբոյանները հարստացել են:

Մամուլում վերջին շրջանում շրջանառվում է, որ նա լքելու է պաշտոնը, չի բացառվում. օգտագործեցին, այժմ էլ դեն են նետելու. գոնե փող ու տուն ունի, դրսում չի մնա:

NEWSPRESS.am