Վարչապետի ինչի՞ն է պետք ՀՀԿ-ն

Այսօր կառավարության նիստի ժամանակ վարչապետ Կարեն Կարապետյանը հայտարարել է, որ անդամագրվում է ՀՀԿ կուսակցությանը՝ մանրամասնելով, որ «իրեն հոգեհարազատ է ՀՀԿ-ի գաղափարախոսությունն ու այնտեղ իր համար ընդունելի բազմաթիվ մարդիկ կան»:

Եթե ՀՀԿ-ն, որը գոյություն ունի շուրջ 2 տասնամյակ, և ՀՀԿ-ի գաղափարախոսությունը, որի հիմքում նժդեհյան գաղափարներն են, այդքան հոգեհարազատ էր վարչապետին, ապա նա կարող էր իր վարդագույն երազանքն ավելի շուտ իրականացնել, թեկուզ «Գազպրոմ-Արմենիայում» կամ էլ Երևանի քաղաքապետի պաշտոնում՝ ընդգծելով իր սերն ու համակրանքը առ ՀՀԿ:

Սակայն, չգիտես ինչու, 2017թ. ընտրություններից առաջ, վարչապետի մոտ նոր սեր է ծլարձակել։ Այստեղ ավելի շուտ քաղաքական սիրո մասին է խոսքը, ոչ թե գաղափարախոսական։ Ինչևէ։

Ինչ վերաբերում է վարչապետի ՀՀԿ դառնալուն, ապա նշենք, որ առանց ՀՀԿ-ի էլ նա վատ չէր ապրում, աշխատանք ուներ, փողը ևս ուներ և ունի և դրա համար Կարապետյանին ՀՀԿ-ն պետք չէ, էլ որտեղի՞ց է գալիս այդ սերը: Մնաց քաղաքականությունը։

Կարեն Կարապետյանը հաստատ հասկանում է, որ ՀՀԿ-ին անդամագրվելով՝ այն փոքրիկ հույսն ու վստահությունը, որը կար նորանշանակ վարչապետից, խորտակվեց։

ՀՀԿ-ն երկրում ո′չ սեր է վայելում, ո′չ հարգանք։

ՀՀԿ-ին պահում են ՀՀԿ-ականները։ Իսկ այն, որ գրում էին վարչապետի մասին, թե նրա հայտարարությունները սոսկ «փուչիկ» են, նա ոչինչ էլ մտադիր չէ փոխել, երևի թե ճիշտ էր, քանի որ այս ընթացքում, եթե վարչապետը որևէ բան է փոխել, ապա դա կառավարության անդամներին «գազավիկներով» ու ազգականներով փոխարինելն է։

Է դրա համար արժե մեծ աղմուկ բարձրացնել։ Հատկապես, որ «գազավիկները» գազից փող քամելուց բացի, մեծ հաշվով, այլ մասնագիտական որակավորումներ չունեն, շատ խելք պետք չէ հասկանալու համար, որ այդպես էլ շարունակելու են․ հարկայինից մինչև նախարարներ։

Ա′յ Կարեն Կարապետյան, Ձեր ինչի՞ն էր պետք ՀՀԿ-ն, հանգիստ ապրում էիք, էլի, հիմա մնալու եք Դուք և ՀՀԿ-ն և ընտրություններում գործելու եք այնպես, ինչպես ՀՀԿ-ական «տրադիցիաներին» է վայել։ Արժե՞ր։

Ի դեպ, պետք չէ տեղին-անտեղին Նժդեհին վիրավորել, ոմանք անգիտակցաբար են վիրավորում, դա ներելի է, իսկ ոմանք՝ գիտակցաբար. դա արդեն աններելի է։ Կան մարդիկ, ովքեր ՀՀԿ-ական են, դա նրանց ներելի է, իսկ կան մարդիկ, որոնց համար ՀՀԿ-ն խարան է ողջ կյանքի համար։

NEWSPRESS.am