«Ես կպատկերացնեմ, օր եթե էս էժան տոմսը վերցնեմ, տեղ վայթե չհասնիմ». «Պոբեդայի» գներն ու գյումրեցիների մտավախությունները

Հոկտեմբերին հայտարարվեց, որ ռուսական «Պոբեդա» ավիաընկերության հետ պայմանավորվածություն է ձեռք բերվել շաբաթական 3 անգամ Գյումրիի «Շիրակ» օդանավակայանից դեպի Մոսկվայի «Վնուկովո» օդանավակայան, ինչպես նաև հետադարձ ուղղությամբ թռիչքներ իրականացնել, բյուջետային ավիափոխադրման տոմսի գինն էլ սկսած 10,000 դրամից։

Արդեն հայտնի է Գյումրիից թռիչքի օրը՝ դեկտեմբերի 15-ին առաջին թռիչքն է իրականացվելու։ Տոմսերի վաճառքն էլ սկսվել է նոյեմբերի 24-ից։ Շատերին է հետաքրքրում, թե «Պոբեդան», իրոք, էժա՞ն է, թե՞ միայն գովազդ։

Միայն որոշ վաճառքի կետերում կարելի է գտնել Գյումրի-Մոսկվա չվերթի տոմսեր։ NEWSPRESS.am-ի հետ զրույցում «Վարդպարոնյան» ավիաձեռնարկության մենեջեր Գայանե Մանուչարյանը նշեց. «Հարցնողները շատ են, պահանջարկը շատ մեծ է, որոշակի գներով տոմսերը սահմանափակ են։ Ամենաէժանը 8300 դրամով 10 կգ ուղեբեռով տոմսն է, բայց ամեն օր փոխվում է տոմսի արժեքը։ Բոինգը 180 ուղևորի համար է, չի կարող էդպիսի բարձրակարգ ինքնաթիռի տոմսերը բոլորը նույն 8,300 դրամով վաճառել։ Կան տարբեր գներ, որոշ քանակ 8,300, որոշը 10,000, 12,000 դրամ և աճում է, կախված ուղեբեռի չափից, ես տեսնում եմ մինչև 58,000 դրամանոց տոմս, որը հնարավորություն է տալիս մինչև 30 կգ ուղեբեռ տանել»։

Փաստորեն, ստացվում է, որ նույն չափի ուղեբեռով տոմսի արժեքն ստացվում է ավելի թանկ, քան Երևանից թռիչքը /Երևանում նույնն արժե 43,000 դրամ/։ Բայց ավիաձեռնարկության մենեջերը նշեց, որ ամեն ինչ կախված է պահանջարկից, եթե տեսնեն, որ գնորդներ չկան, կարող է էժանացնեն։ Հատկապես թանկ են դեկտեմբերի վերջի օրերի տոմսերը։ Ամեն օր տոմսերի տարբեր արժեքներ են բացվում համակարգում։

Գյումրեցիները գալիս, հետաքրքրվում են, բայց և կասկածանքով վերաբերվում, որ էժանը կլինի որակով․ «Ես իմացել եմ, եկել եմ տեսնիմ՝ ինչ արժե, ուղեբեռ տանիմ, թե թևերս թափ տալով երթամ, բայց քիչմ չեմ հավատա․․․ Ես կպատկերացնեմ, օր եթե էդ էժան տոմսը վերցնեմ, տեղ վայթե չհասնիմ»,- նշեց գյումրեցի մի կին, ում ամուսինն ու տղաները Ռուսաստանում են ու ցանկանում էր հասցնել ու «Պոբեդայի» տոմս ձեռք բերել, որ Նոր տարին դիմավորեն ընտանիքով։ Մեկն էլ կողքից հավելեց․ «Քա, ըդիկ խաբուսիկ բան է, հաստատ գիտեմ, օր 5 ժամ ուշացում կուտա։ Ես չեմ հավատա, Գյումրիից ինչքան թռել եմ, միշտ ուշացում է եղել»։

Սրան ի պատասխան՝ ավիադրամարկղի տնօրեն Անուշավան Շահպարոնյանը նշեց․ «Չի կարող չվերթի ուշացում լինել, որովհետև ինքն ունենալու է 35 րոպե ժամանակ, չի կարող սպասել, սպասարկման վճար չի տալիս «Շիրակ» օդանավակայանին։ Թռիչքը իրականացվելու է Բոինգ տեսակի ինքնաթիռով ու տեղերի միայն 50 տոկոսն է էժան գներով լինելու, մյուս տոմսերը արդեն այլ գնով են վաճառվելու, իսկ առաջին թռիչքի բոլոր Էժան տոմսերը արդեն վաճառվել են»։

Մի տարեց կնոջ էլ, երբ հարցրեցի՝ «Պոբեդայո՞վ» է ուզում գնալ Մոսկվա, ժպիտով պատասխանեց․ «Ինչով գուզե էղնի, «Պոբեդայով» կեղնի, «Քսանչորսով», թե «Մոսկվիչով»․ կարևորը լավ տեղ հասնիմ։