Պաշտոնյաների ոհմակը կերել է իմ փողերը. խաբված ազատամարտիկը խոստանում է ձայնագրություններ տրամադրել (լուսանկարներ, տեսանյութ)
Արդեն մեկ ամիս է, ինչ կառավարության դիմաց բողոքի ակցիա կազմակերպողների շարքում է հայտնվել նաև ազատամարտիկ Սարգիս Ղազարյանը:
Նա հայտարարել է հացադուլ և պահանջում է վերանայել Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի որոշումը, որով Սարգիս Ղազարյանը, իր իսկ խոսքով, հանիրավի դատապարտվել է տուգանքի՝ 300 000 ՀՀ դրամի չափով:
Սարգիս Ղազարյանը Զովունի գյուղից է: Նա NEWSPRESS.am-ի հետ զրույցում պատմեց, որ «Արցախբանկի» նախկին աշխատակից Անուշ Շահրամանյանի և իր միջև նոտարական վավերացմամբ կնքվել է փոխառության պայմանագիր: Վերջինիս համաձայն՝ ազատամարտիկը գումարներ է տվել Անուշ Շահրամանյանին, սակայն պայմանավորվածության համաձայն, երբ Սարգիսը պահանջել է մայր գումարը, նրա նկատմամբ քրեական գործ են հարուցել՝ վաշխառության համար:
«Հլա մի հատ պոիսկ տվեք Անուշ Շահրամանյան, տեսեք, թե քանի մարդու ա քաշել ու թռել… ինքը ոհմակից մեկն ա, էս գործին խառնված են բարձրաստիճան անձինք, ԱԺ պատգամավոր… նրանք են կերել էդ փողերը: Լրիվ ձայնագրությունները տվել եմ իրենց, բայց դրանց ընթացք չեն տալիս»,- մեզ հետ զրույցում ասաց Սարգիս Ղազարյանը` ևս մեկ անգամ պարզաբանելով, որ ինքը որևէ մեկին պարտք չէ, այլ պարտք է բանկի նախկին աշխատակիցը: Խոսքը 54 000 դոլարին համարժեք ՀՀ դրամի մասին է:
Նա վարչապետ Կարեն Կարապետյանին դիմել է նամակով: Վերջինիս հանձնարարականներից, սակայն, ազատամարտիկն այնքան էլ գոհ չէ:
«Ստացել եմ նույն պատասխանը, ինչ-որ դրանից առաջ ստացել եմ, բայց նորից դիմում եմ վարչապետին, քանի որ ունեմ հստակ ձայնագրություններ, թե ովքեր են տնօրինում այդ գումարները…»,-նշեց Սարգիս Ղազարյանը:
Մանրամասները՝ տեսանյութում
