Ցանկանում են 1000-ական դրա՞մ հավաքել, թող 10 մլն գողացվածը հետ բերեն. Գուրգեն Եղիազարյան

Իշխանություններն իրենց լրիվ վարկաբեկել են, էլ տեղ չի մնացել, անկյուն չի մնացել: Այդ մասին NEWSPRESS.am-ի հետ զրույցում, անդրադառնալով «1000 դրամ բանակին» նախաձեռնությանը՝ ասաց ԱԱԾ նախկին պետի տեղակալ Գուրգեն Եղիազարյանը:

Նա հիշեցնում է իշխանության կողմից վերջին 10 տարվա ընթացքում հնչող խոստումները, որոնք այդպես էլ միայն խոստում են մնացել: Նախկին պաշտոնյայի խոսքով` հարկավոր է ստեղծել մի դաշտ, որն աշխատի ի նպաստ ժողովրդի, մինչդեռ մինչ օրս ճիշտ հակառակն է արվել: Նա իշխանության 10 տարվա անգործությամբ է բացատրում նաև 1000-ական դրամների հետ կապված առաջարկը:

«Խնդիրն այստեղ 1000-ական դրամները չեն, իշխանությունը հասկացել է, որ այսպես շարունակել չի կարող և նույնիսկ ցանկացած կեղծիքի դեպքում էլ չի կարող մնալ իշխանության: Շրջանառության մեջ դնելով մեկ պետություն, մեկ ազգ, մեկ բանակ կարգախոսը, փորձում են վերացնել ժողովուրդ-ՀՀԿ անջրպետը, որը սարսափելի մեծ է… Մեկ ազգ, մեկ բանակ կոչի տակ ուզում են համախմբել հայ ժողովրդի՞ն. այսինքն՝ էնքան լավ է` էս պատմությունները, սոցիալական վիճակը, արտագաղթը մի կողմ` արդեն, բռունցքվենք մեկ ազգ մեկ գաղափարի շո՞ւրջ… Գլխավորն էստեղ էդ բռունցքվելն է, ոչ թե հազարական դրամները»,-ընդգծեց Գուրգեն Եղիազարյանը:

Նրա դիտարկմամբ` մենք պետք է իմանանք, թե ում հետ բռունցքվենք և ուր գնանք:

«Ցանկանում են հազարական դրա՞մ հավաքել, թող 10 մլն գողացվածը հետ բերեն… շատ հանգիստ կարելի է հետ բերել և ժողովրդից չուզել էդ 1000 դրամները»,- եզրափակեց ԱԱԾ նախկին պաշտոնյան: