Ծառուկյանի վերադարձն իշխանության ինքնապահպանման երաշխիք է

Մամուլում շրջանառվող լուրերի համաձայն՝ ԲՀԿ-ից հեռացած և իշխող հանրապետական կուսակցությունում տեղավորվել փորձող պատգամավորներին ՀՀԿ-ից հասկացրել են, որ նրանք խորհրդարանում տեղ չունեն: Սա թերևս կարելի էր սպասել: Ունիկալ մտածողություն հարկավոր չէ մարդուն՝ հասկանալու համար, որ Ծառուկյանին ինչպես ճանապարհել, այնպես էլ քաղաքականություն մտնելու «դաբրոն» կամ անցաթուղթը տվել է միևնույն ուժը: Դա երկրի ու իշխող կուսակցության նախագահ Սերժ Սարգսյանն է:

Այն, որ Գագիկ Ծառուկյանը վերադառնում է ոչ ընդդիմություն, ակնհայտ է: Հայաստանում արդեն բոլորը գիտեն, որ հնարավոր չէ միևնույն ժամանակ լինել և՛ օլիխարխ, և՛ ընդդիմություն:

Հիշենք, թե ինչպես Նախագահը 2015-ի փետրվարին հայտարարեց, թե «Ծառուկյան քաղաքական դերակատարը մեր երկրի համար դարձել է չարիք…», որից հետո Գագիկ Ծառուկյանը հեռացավ քաղաքականությունից: ԲՀԿ հիմնադիրի վերադարձը թերևս դեռ այն ժամանակ կանխորոշված էր. մի կողմից նրա կուսակից ընկերների հայտարարությունն այն մասին, որ Գագիկ Ծառուկյանը ժամանակավոր է հեռացել քաղաքականությունից, մյուս կողմից էլ երկրի նախագահի զգուշավոր արտահայտություններն արդեն իսկ հուշում էին, որ սա շոու էր, որը քաղաքականության մեջ բաղկացուցիչ մաս է կազմում և ինքնանպատակ չէ:

Հիշենք նաև Նախագահի՝ արդեն «թևավոր» դարձած արտահայտությունը՝ «օդում կախված լուրերի» մասին: Հենց այդ «օդում կախված լուրերի» հիման վրա էլ Սերժ Սարգսյանը հորդորել է վարչապետին ստուգումներ իրականացնել «գողացված միլիարդները գտնելու» համար:

Ինչպես և կանխատեսվում էր, օդում կախված լուրերը «ստահոդ էին»… Այսօր Գագիկ Ծառուկյանը քաղաքականություն է վերադառնում, որպես «պետության համար կենսական անհրաժեշտություն» և համաժողովրդական պահանջ. այսպես է հայտարարել Նաիրա Զոհրաբյանը ԲՀԿ քաղաքական խորհրդի ընդլայնված նիստում արված իր ելույթի ժամանակ:

Այն, որ այս հայտարարությունն ուռճացված է՝ ակնհայտ է:

Քաղտեխնոլոգ Արմեն Բադալյանի որակմամբ՝ ցանկացած քաղաքական գործիչ կարող է նման ամպագոռգոռ հայտարարություններ անել, քանի որ բացահայտ չեն կարող հայտարարել վերադարձի իրական պատճառները: Այս դեպքում՝ Ծառուկյանի վերադարձն իշխանության ինքնապահպանման երաշխիք է:

NEWSPRESS.am-ի հետ զրույցում քաղտեխնոլոգը նկատեց, որ հանրապետական կուսակցությունն, ըստ էության, չի կարող ո՛չ խորհրդարանում, ո՛չ էլ խորհրդարանական քվեարկությունների ժամանակ ցանկալի արդյունք ստանալ, եթե չունենա դաշնակից: Արմեն Բադալյանի խոսքով՝ ՀՅԴ-ն ևս դաշնակից է, բայց նրա ձայները բավարար չեն:

«Օրինակ՝ կա հոդված, որով Կարեն Կարապետյանը 2018 թվականին չի կարող կառավարել, քանի որ վարչապետը պետք է պարտադիր 4 տարվա բնակություն ունենա ՀՀ-ում… այդ հոդվածը կարելի է փոխել երկու երրորդով, իսկ էդ երկու երրորդը պետք է ապահովի ԲՀԿ-ն: Ահա թե ինչու է անհրաժեշտ ԲՀԿ-ի ներկայությունը»,- նշեց Արմեն Բադալյանը:

Նրա խոսքով՝ եթե հանրապետականը միայնակ ապահովեց այդ ձայները, ուրեմն դիմել է կեղծիքների, իսկ գործող իշխանությանը դա հարկավոր չէ, քանի որ Արևմուտքից շատ խստորեն է դրվել այս հարցը:

«Եթե եղան կեղծիքներ՝ հնարավոր է՝ Արևմուտքը ֆինանսապես չաջակցի, իսկ դա արդեն լուրջ տնտեսական խնդիրներ կարող է առաջացնել երկրի ու կոնկրետ չինովնիկների համար»,- նկատեց քաղտեխնոլոգը:

Արմիեն Մկրտումյան