Հայաստանում Թրամփից հարուստ առնվազն 5 միլիարդատեր կա. Արամ Մանուկյան

Ձեր ներկայացրած ծրագիրը բացարձակ ադեկվատ չէ այս իրավիճակին: Այդ մասին այսօր Ազգային ժողովում, դիմելով կառավարությանն ու Ֆինանսների նախարար Վարդան Արամյանին՝ ասաց ՀԱԿ խմբակցության պատգամավոր Արամ Մանուկյանը:

«Դուք ներկայացնում եք թվեր՝ այս գյուղի, այն դպրոցի: Ախր բյուջեի իմաստը դա չէ: Բյուջեն քաղաքական փատսաթուղթ: Այն պետք է քաղաքական լուծումներ առաջարկի: Դուք բացարձակ Հայաստանի տնտեսության հիվանդ կողմերին չեք անդրադառնում: Չեք արտասանում ո′չ կոռուպցիա, ո′չ մենաշնորհ, ո′չ ազատ մրցակցություն: Ճիշտ եք ասում՝ տնտեսությունը պետք է զարգանա, որ իքս գումարը դառնա երկու իքս գումար: Բայց որևէ ձեր կոնցպետը, ինչո՞վ եք տարբերվում նախորդ կառավարություն, նախորդի նախորդ կառավարությունից: Մենք չենք քննարկելու՝ դուք էդ դպրոցի փողը տվեցի՞ք, թե՞ չէ: Դուք նոր կառավարություն եք, եկել եք նոր կոնցեպտով, ո՞րն է ձեր կոնցեպտը: Չկա այդ կոնցեպտը»,- ասաց պատգամավորը:

Մանուկյանի խոսքով՝ Հայաստանի տնտեսությունը տառապում է կոռուպցիայի, մենաշնորհների և բացասական հիվանդությունների արդյունքում. «Դրա դեղատոմսը բերե՞լ եք:  3-4 ամիս է՝ ասում եք՝ վարչապետն սպասում է իրավիճակի վերլուծության, որից հետո կլինի դեղատոմսը: Ասեք ձեր դեղատոմսը, Հայաստանի զարգացման ձեր մոտեցումները, որի արդյունքում բյուջեն կավելանա: Մենք խոսում ենք իքս գումարի ներսում փոփոխություններ անելու մասին: Իքս գումարի՝ երկու իքս դառնալու մասին ոչ մի բան չեք ներկայացնում»,- նշեց նա:

Ֆինանսների նախարար Վարդան Արամյանը համաձայնեց՝ բյուջեն քաղաքական փաստաթուղթ է, նաև գործիք է մակրոտնտեսական կառավարման համար:

«Մենք հստակ ներկայացրել ենք այն մոտեցումները, որը մեր կառավարությունը որդեգրել  է: Դա մակրոտնտեսական կայությունն է, և վերջնական նպատակը տնտեսական աճի հիմքերի ուժեղացումն է: Պետք է արվի երկու մակարդակի գործողություն. մեկը մակրո մակարդակում, մյուսը՝ միկրո մակարդակում: Ձեր ասած կոռուպցիայի  գործողությունները, որոնք միկրո մակարդակի գործողություններ են ենթադրում, դրանք արծարծված են կառավարության ծրագրում»,- ասաց նախարարը:

Նա օրինակ բերեց, թե ինչպես կարելի է կոռուպցիայի դեմ պայքարել. «Ընդունված է ամբողջ աշխարհում, որ լավագույն գործիքներից մեկը, եթե դուք գնում եք էվոլյուցիոն ճանապարհով, տեղեկատվական համակարգերի ներդրումն է, որպեսզի մարդը մարդու հետ չշփվի: Եվ ամենակարևորը, որ մեր կառավարության ծրագրում գրված է, էլեկտրոնային կառավարման համակարգերի ուժեղացումն է: Դա գործիքներից մեկն է, որպեսզի կոռուպցիան նվազի: Կոռուպցիան ծնվում է այնտեղ, երբ մարդը թղթերը դնում է թևի տակ, գնում է չինովնիկի մոտ, չինովնիկն էլ ասում է՝ քո կյանքը շատ վտանգավոր է, որովհետև եթե դու ինձ լավ չնայես… էս համակարգերն ինչպե՞ս արմատախիլ անենք: Երբ որ տարանջատենք, որ մարդը թղթերը չդնի իր թևի տակ և չգա չինովնիկի մոտ, չասի՝ գիտե՞ս՝ ես լիցենզիա եմ ուզում, թույլտվություն եմ ուզում: Քայլ: Մենք վերջերս նաև ընդունեցինք մեկ մոտեցում, որ ենթադրենք լիցենզիա ունենալը պետք է էլեկտրոնայնացվի: Արդյոք սա կոռուպցիայի դեմ ուղղված քա՞յլ է: Այո: Այս երկուսը պետք է տարանջատենք: Բյուջեն նաև սոցիալական պարտավորություն է, բյուջեն ենթակառուցվածքներին ուղղված միջոցներ է: Եթե մենք թվերով խոսենք, ապա միայն սոցիալական ոլորտում այն, ինչ մենք օրենքով պարտադրված ենք, որ իրականացնենք, ամբողջ 1 տրիլիոն, 360 միլիարդի 1 տրիլիոն 320 միլիարդն ամբողջությամբ օրենքներով մեր ստանձնած պարտավորություններ է, միջազգային պայմանագրերով ստանձնած պարտավորությունները շուրջ 96 միլիարդ է: Ես վստահ եմ՝ կառավարության կողմից նախաձեռնած քայլերը հաջողություն են ունենալու:

Պատգամավորը կրկին արձագանքեց և նշեց. «Դուք մեր հիվանդ, քայքայվող տնտեսությանը նայում եք որպես 50 տարվա բուժվող համակարգ, դուք նրան տալիս  եք մրսածության դեղեր: Բայց համակարգը փտախտի մեջ է, քայքայվում է: Ձեր արած քայլերը թեև ճիշտ, բայց ադեկվատ չեն մեր քայքայվող տնտեսությանը: Ռադիկալ բաներ են պետք: Մի երկիր, որտեղ պաշտոնապես 40 տոկոս ստվեր կա, դուք դրա մասին բացարձակ չեք ասում: Մեր երկրում առնվազն 5 հոգի Թրամփից հարուստ միլիարդատերեր կան, Էդ ո՞նց է առաջացել, չէ՞ որ դա համակարգային հիվանդության արդյունք է մրսածության արդյունք չի: Դուք ռակը թողած՝ մրսածության կաթիլներ եք տալիս: Էս երկիրն ուշքի չի գա: Ձեր ասածի մեջ ռազմավարություն չկա»,- արձագանքեց պատգամավորը: