Հանրապետականը կողոպիտիչների ակումբ է. Աշոտ Մանուչարյան

Հանրապետության վարչապետ Կարեն Կարապետյանը հայտարարել է, թե ՀՀԿ-ին անդամագրվելով՝ իր վարկանիշն ընկել է։

Թե ինչն է առիթ տվել վարչապետին նման հայտարարություն անել, դժվար չէ կռահել. հասարակության մեջ իշխող կուսակցության նկատմամբ հակակրանք կա, դա մի կողմից, մյուս կողմից էլ՝ կուսակցական շրջանակում գործել, նշանակում է՝ ունենալ սահմանափակ հնարավորություններ:

«Ղարաբաղ» կոմիտեի նախկին անդամ Աշոտ Մանուչարյանը, NEWSPRESS.am-ի հետ զրույցում անդրադառնալով վարչապետի հայտարարությանը՝ նկատեց, որ իշխող շրջանակները հավաքվել են մի տեղ, որը կոչվում է Հանրապետական կուսակցություն:

Նրա դիտարկմամբ՝ դա կառավարման մշակույթի սովորական բաղկացուցիչ մասերից է: Աշոտ Մանուչարյանը հույս ունի, որ վարչապետը փորձում է այս ճանապարհով հասնել երկրի տիրող իրավիճակի դրական փոփոխությանը, բայց դա, ըստ նրա, քիչ հավանական է թվում:

«Այդպես է՝ հասնել բարձր պաշտոնի և այդտեղից ինչ-որ բան իրականացնել… հնարավոր է՝ լինեն դրական փոփոխություններ ու հասնի նրան, որ կողոպուտը վերանա, բայց կարևորագույն մի բան կա, դա վերևից էլ սահմանափակում ունի ու երկրի կառավարման փիլիսոփայությունը դրանով չի փոխվում… Կարեն Կարապետյանի կողմից արված փոփոխությունները պետք է լինեն բոլոր դեպքերում սահմանափակ, եթե իհարկե լինեն…»,- իր խոսքում նկատեց Աշոտ Մանուչարյանը:

Նա չի բացառում նաև, որ նախկին պաշտոնյաները, այդ թվում նաև՝ վարչապետ Հովիկ Աբրահամյանը, հնարավորություն կունենան վերադառնալու: Ըստ Աշոտ Մանուչարյանի՝ Հանրապետականում հավաքվել են այն մարդիկ, ովքեր կողոպուտով են զբաղվել և հիմա կիսատ գործ ունեն շարունակելու:

«Նախկին վարչապետը, այն մեկը, մյուսը… բոլորը, ովքեր կողոպուտով զբաղվել են, ասել են՝ «Տղերք, մենք մեր պարտականությունները վատ ենք կատարել, հիմա մենք նորից պետք է ընտրվենք…», քանի որ Հանրապետականը կողոպտիչների ակումբ է: Հիմա, եթե մի ուրիշ շրջանակ էլ գտնում է, որ Հանրապետականը պետք է խելքի բերվի, ապա այդ շրջանակը պետք է ասի՝ ո՛չ: Դա ինտրիգի մասն է. թե ինչ կլինի, կտեսնենք»,-ասաց Մանուչարյանը և հավելեց, որ ամեն դեպքում քիչ է հավատում, թե դրական փոփոխություն կլինի:

Նա հիշեցնում է, թե ինչպես հանրապետականներն անցկացրին Սահմանադրությունը:

«Խանդավառ ապուշի դեմքով ընդունեցին Սահմանադրություն, թեև զգուշացնում էին, որ դրա մեջ դրված է երեխաներին ընտանիքից խլելու կետ… մի երկուսն էլ ասացին, թե՝ հա, ծնողները դեմ կլինեն, չեն տա, բայց ո՞վ է նայում ծնողներին… էդ մարդիկ հոգեկան խանգարման մեջ գտնվող մարդիկ են՝ փողը տեսել են, խելքները կորցրել, էդ մարդիկ, պարզ է, որ կուզեն մի բան լինի, միայն թե փող աշխատեն…»,- ընդգծեց մեր զրուցակիցը:

Նրա որակմամբ՝ եթե Հանրապետական են, ապա դա կարող է ընդունվել որպես անմեղսունակության թուղթ…