Հարգանքի տուրք 1988 թվականի երկրաշարժի զոհերի հիշատակին (լուսանկարներ)

Երկրաշարժից անցել է 28 տարի, վերքը սպիացել է, բայց հետքն ու ցավը շարունակում են ուղեկցել Գյումրիին ու գյումրեցուն։ Ամեն տարի դեկտեմբերի 7-ին գյումրեցու աչքի առաջ «ժաժքն է», ամեն տարի այս օրը նայելով քաղաքի դիմագծին՝ հասկանում ես, որ կնճիռները շատ են, բայց եղել է ու կա այն լուսավորը, որ ապրեցրեց գյումրեցուն ու շունչ տվեց քաղաքին։

Չխոնարհված քաղաքը դառնում է խոնարհ դեկտեմբերի 7-ին։ Գյումրեցին իր հարգանքի տուրքը մատուցում է՝ այցելելով գերեզմանատներ, վերհուշելով ու ցավելով, մասնակցելով պատարագներին։

Եթե վերջին տարիներին պաշտոնյաներից շատերը հորդորում էին մոռանալ ու չէին այցելում Գյումրի, որ դրանով նպաստեն «վերքի սպիացմանը», այս տարի շատերն էին եկել։ Վարչապետ Կարեն Կարապետյանի հետ նախարարական գրեթե ողջ կազմն էր, Ազգային ժողովի պատգամավորներ, մարզային ու քաղաքային իշխանության ներկայացուցիչներ։ Սա այնքան էլ չզարմացրեց գյումրեցիներին, հոգոց հանելով ու հեգնանքով նշեցին․ «Նախընտրական տարի է, հըբը չգա՞ն»։

11,41 րոպե․․․ 28 տարի առաջ հենց այս րոպեին վայկյանների ընթացքում քաղաքը դարձավ ավերակ: Ինչպես անցնող 28 տարիներին, այս տարի էլ 11,41 չոպեին քաղաք այցելած հյուրերն Ամենափրկչի բակում տեղադրված անմեղ զոհերի հուշակոթողի մոտ մեկ րոպե լռությամբ իրենց հարգանքի տուրքը մատուցեցին։

Շիրակի թեմի առաջնորդ Միքայել եպիսկոպոս Աջապահյանի ձեռմամբ հոգեհանգստի կարգ մատուցվեց, ապա դիմելով բոլորին՝ նշեց․ «Պետք է քննենք, որ երկրաշարժից 28 տարի անց լուսո որդիներ ունենք, պատրաստ ենք անկնկալներին, թե դարձյալ պետք է մնանք անպատրաստ։ Լինենք պատրաստ մեր աշխատանքով, մեր քրտինքով, լավատեսությամբ ու բարոյական սկզբունքներով, որ մեր նահատակները հանգիստ ննջեն։ Թող շեն մնա մեր Հայաստանը, Գյումրին»։