Կանայք պետք է վաստակեն իրենց քվեն, ոչ թե պաշտոն ժառանգեն հորից, ամուսնուց կամ սիրեցյալից. Ազատ Արշակյան

Հայաստանում, իսկ ավելի կոնկրետ Հանրապետական կուսակցությունում նկատվում է պաշտոնի ժառանգականության սինդրոմ: Հայրերը դուրս են գալիս Ազգային ժողովից կամ զբաղեցրած այլ պաշտոնից՝ իրենց տեղը փոխանցելով որդիներին:

Գերագույն խորհրդի պատգամավոր Ազատ Արշակյանը, գնահատելով իրավիճակը` նկատում է, որ Հայաստանը ֆեոդալական մտածելակերպով մարդկանց ձեռքում է:

NEWSPRESS.am-ի հետ զրույցում նա նշեց, որ քաղաքական իշխանությունում հայտնվել են մարդիկ, ովքեր ֆեոդալական մտածելակերպ ունեն. նրանք կարծում են, որ Հայաստանը՝ այն մարզը, այն տեղը, որ զբաղեցնում են, իրենց սեփականությունն է, իսկ սեփականությունը հարկավոր է կտակել ժառանգներին:

«Նրանց պետք է հիշեցնել ֆրանսիական և ռուսական հեղափոխությունների արդյունքները, որտեղ ամբողջ դինաստիային գնդակահարեցին: Կոպիտ սխալ են անում: Ժառանգականությունը վատ բան է, ժառանգաբար կարելի է արժանապատվությունը թողնել, իսկ մնացած ամեն ինչ կոպիտ սխալ է, իշխանությունը ժառանգաբար չի կարելի փոխանցել ո՛չ որդիներին, ո՛չ խնամիներին…»,- նշում է Ազատ Արշակյանը:

Դիտարկմանը, որ ՀՀԿ-ում պատգամավոր են ուզում դառնալ կանայք, ովքեր սխալ ընկալում ունեն այդ պաշտոնի մասին մինչև իսկ այնքան, որ պատգամավորը նույնացնում են «թագուհու» հետ, Արշակ Ազատյանը ժպիտով կեսկատակ նկատեց.

«Չէ, թագուհի չէ՝ իշխանուհի…»:

Ընդհանուր առմամբ, նա դեմ չէ, որ կանայք ընդգրկված լինեն քաղաքականության մեջ: Ըստ Ազատ Արշակյանի՝ գոնե 53 տոկոսով նրանց հարկավոր է ներգրավել, սակայն կանայք պետք է ինքնուրույն աճեն:

«Ինքը պետք է նվաճի իր պաշտոնը, ոչ թե ժառանգություն ստանա իր հորից, ամուսնուց, կամ որ ավելի վատ է՝ սիրեցյալից. պետք է վաստակի իր քվեն»: