Ես ԼՀԿ-ի ամեն մի հայտարարության չեմ պատրաստվում պատասխանել. Մամիկոն Ասլանյան

Ինչպես և կանխատեսվում էր, տապալվեց Վանաձորի ավագանու հերթական նիստը:

Հիշեցնենք, որ 2016թ. դեկտեմբերի 5-ին կրակի հետ անզգույշ վերաբերվելու պատճառով այրվել և ոչնչացվել են Լոռու մարզի Վանաձոր քաղաքի «Ուկրիշին» 4-րդ տնակային ավանում գտնվող 4 բնակիչներին պատկանող բնակարանները և գույքը:

Վանաձորի քաղաքապետ Մամիկոն Ասլանյանը դեկտեմբերի 13-ին արտահերթ նիստ էր հրավիրել՝ համայնքի բյուջեից հրդեհի հետևանքով անօթևան մնացած ընտանիքներին ֆինանսական աջակցություն հատկացնելու նպատակով։

Այս առիթով «Լուսավոր Հայաստան» կուսակցության նախագահ Էդմոն Մարուքյանը հայտարարել էր, թե «…դժբախտությունը շահարկելով` փորձում են նիստ գումարել…»: Նրա դիտարկմամբ՝ «շանտաժը չաշխատեց»: Այժմ ԼՀԿ-ն պատրաստվում է հանգանակություն հավաքել՝ տուժած ընտանիքներին տրամադրելու համար:

«Թո՛ղ աշխատեն, թո՛ղ ցույց տան, որ իրենք էլ այս քաղաքի բնակիչ են ու մտածում են քաղաքացիների մասին»,- NEWSPRESS.am-ի հետ զրույցում ասաց Վանաձորի քաղաքապետ Մամիկոն Ասլանյանը՝ արձագանքելով ԼՀԿ-ի հանգանակության մասին հայտարարությանը: Նա նշեց, որ անկախ նրանից՝ ավագանու ընդդիմադիր անդամները կներկայանան նիստին, թե ոչ, ինքը մնալու է իր սկզբունքին ու խոստմանը հավատարիմ՝ աշխատելու է իր քաղաքի բարօրության համար: Ինչ վերաբերում է հրդեհից տուժած ընտանիքներին, ապա քաղաքապետը վստահեցնում է, որ նրանց օգնելու համար արդեն իսկ հանգանակություն են հավաքում:

«Մենք մեր հույսը, եթե դնենք միայն ավագանու նիստերին, ապա այդ ընտանիքներին այդպես էլ ոչ ոք չի օգնի, զուգահեռաբար հանգանակություն ենք հավաքում, և նաև նրանք հենց իմ կողմից աջակցություն կստանան…»,-ասաց Մամիկոն Ասլանյանը:

Նա ընդհանրապես, իր իսկ խոսքով, չի հասկանում ընդդիմության մոտիվացիան. «Եթե նրանք չէին աշխատելու՝ ավելի լավ էր ցուցակում ընդգրկեին մարդկանց, ովքեր կաշխատեին, իսկ իրենք թող օպերատիվ-հետախուզական խումբ ձևավորեն և զբաղվեն այդ 4 կողմ քվեարկողների բացահայտմամբ…»,- ընդգծեց քաղաքապետը:

Ինչ վերաբերում է հայտարարությանը, ըստ որի՝ մինչ 2017թ.. հունվարի 10-ը «Լուսավոր Հայաստանը» կդիմի կառավարությանը՝ քաղաքի ավագանին լուծարելու պահանջով, ապա Մամիկոն Ասլանյանը նկատում է.

«Ես աշխատում եմ հանուն իմ քաղաքի և չեմ ընդմիջում իմ աշխատանքը, որպեսզի այս բոյկոտների հետևանքով քաղաքացիները չտուժեն, այնպես որ՝ պատասխանել ընդդիմության ամեն մի հայտարարության, չեմ պատրաստվում»: