ՀԱԿ անդամները «սխալմամբ» կողմ են քվեարկել «1000 դրամների» մասին օրինագծին

ՀՀ Ազգային ժողովն ընդունեց «1000 դրամների» մասին օրինագիծը: 98՝ կողմ, 2՝ դեմ, 1՝ ձեռնպահ ձայներով երկրորդ ընթերցմամբ ընդունվեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասի փոխհատուցման մասին» օրինագիծ և ուղեկցող օրինագծերի փաթեթը:

Թեև ՀԱԿ խմբակցության 7 անդամներն իրենց քվեարկությամբ 98-2 ձայների հարաբերակցության վրա էական ազդեցություն չէին կարող ունենալ, սակայն բոլոր 7-ն էլ, չնայած կոշտ հայտարարություններին, կողմ են քվեարկել «1000 դրամներին»: Քվեարկությունից հետո ՀԱԿ քարտուղար Արամ Մանուկյանը հայտարարեց, թե իրենց խմբակցության անդամները սխալմամբ են կողմ քվեարկել:

Հիշեցնենք, որ ըստ օրինագծի և ուղեկցող օրինագծերի փաթեթի նախատեսվում է աշխատող յուրաքանչյուր քաղաքացուց գանձել ամսական 1000 դրամ՝ զինծառայողների օգնության հիմնադրամին: Զոհվածների և 1-ին խմբի հաշմանդամություն ստացած զինծառայողների ընտանիքները միանվագ կստանան 10 մլն դրամ (2-րդ խմբի հաշմանդամները՝ 5 մլն), իսկ հետագայում՝ 20 տարվա ընթացքում՝ ամսական 300 հազար դրամ:

Սպաների համար այդ գումարը կկազմի ամսական 300 հազար դրամ, ենթասպաների համար՝ 250 հազար դրամ, շարքայինների համար՝ 100 հազար դրամ (զոհվածներն ու 1-ին խմբի հաշմանդամները): Այս դեպքում սպային կամ նրա ընտանիքին 20 տարի շարունակ կհատկացվի 82 մլն դրամ, ենթասպաներին՝ 70 մլն, շարքայիններին՝ 58 մլն: 2-րդ խմբի հաշմանդամների համար նախատեսված է համապատասխանաբար 200, 150 և 100 հազար դրամ ամսական: