Ղարաբաղի հարցի լուծման այլ տարբերակ, քան փուլայինը, գոյություն չունի… ոչ մի հեքիաթի չհավատաք. Լևոն Տեր-Պետրոսյան

Այսօր` դեկտեմբերի 17-ին, տեղի է ունեցել Հայ ազգային կոնգրեսի համագումարը, որի մասնակիցները Լևոն Տեր-Պետրոսյանին ընդունել են հոտնկայս ծափահարություններով ու «Լե-վոն, Լե-վոն…» վանկարկելով:

ՀԱԿ առաջնորդի ելույթը հիմնականում նվիրված էր ղարաբաղյան հակամարտությանը:

Նա իր խոսքում նկատեց, որ բանակցային սեղանին դրված է տարածքների դիմաց Ղարաբաղին կարգավիճակ տալու տարբերակը:

«Ղարաբաղի հարցի լուծման այլ տարբերակ, քան փուլայինը, գոյություն չունի։ 18 տարի առաջ ասում էիք՝ կա, հիմա ցույց տվեք: Գոյություն չունի: Այն, ինչ-որ դրված է հիմա սեղանին, նույն փուլային տարբերակն է: Այսօր բանակցությունների սեղանին, ըստ էության, դրված է կարգավորման փոխզիջումային նույն առաջարկը, ինչ 1997 թվականին»,- հայտարարեց Լևոն Տեր-Պետրոսյանը:

Նա մեջբերեց առաջարկվող տարբերակը. «Որոշ տարածքների զիջման դիմաց Ղարաբաղին միջազգայնորեն ճանաչված միջանկյալ կարգավիճակ շնորհելու, իսկ վերջնական կարգավիճակի հարցը ապագային թողնելու տարբերակը՝ երաշխավորված ղարաբաղա-ադրբեջանական շփման գծում խաղաղապահ ուժերի տեղակայմամբ։ Սա է, ուրիշ բան չկա: Ոչ մի հեքիաթի չհավատաք: Ես նույնիսկ հիմքեր ունեմ կասկածելու, որ 1997 թվականից ցածր կարգավիճակ ունի այսօրվա լուծումը»,- ասաց Տեր-Պետրոսյանը:

Նրա դիտարկմամբ՝ եթե այս պահը բաց թողնենք, ապա հաջորդ տարբերակը Հայաստանի համար ավելի վատն է լինելու: Առաջին նախագահը նկատեց, որ այս կերպ` զիջելով մի մասը, մյուս մասը հնարավոր կլինի պահպանել: Հակառակ դեպքում` կկորցնենք ամեն ինչ:

«Մասը պահողները, փրկողները, հռչակվում են դավաճաններ: Ամեն ինչ կորցնողները կոչվում են հայրենասերներ։ Ինչո՞ւ ենք, ուրեմն, մեր անցավ գլուխը փորձանքի տակ դնում։ Որովհետև, դժբախտաբար, Հայաստանում ճշմարտության երեսին ուղիղ նայող ուրիշ ուժ չկա։ Եթե մենք էլ մյուս «քաջերի», իրականում, ինչ ասեմ՝ ստոր վախկոտների պես լռենք, ողջախոհության ճրագը մեր երկրում վերջնականապես կմարի։ Ուստի, անկախ այն բանից, թե մեզ ինչ պիտակներ կփակցնեն, ես Կոնգրեսին առաջարկում եմ խիզախաբար, առանց աջուձախ նայելու, ընտրությունների գնալ «Խաղաղություն, Հաշտություն, Բարիդրացիություն» նշանաբանով»,- ասաց առաջին նախագահը` հավելելով, որ «փոխզիջման այլընտրանքը պատերազմն է» պնդումը, ապացուցված պատմական անթիվ օրինակներով, վիճարկելի չէ:

Հենց այս նշանաբանի ներքո էլ Լևոն Տեր-Պետրոսյանը պատրաստվում է առաջիկայում այլ կուսակցությունների հետ դաշինքով մասնակցել առաջիկա ընտրություններին: Թե ովքեր են այդ ուժերը` ՀԱԿ ղեկավարն առայժմ չի մանրամասնեց:

Նա նկատեց, որ իր ելույթի նպատակը ոչ թե մարդկանց վհատեցնելն էր, այլ, ընդհակառակը, «ազգին ներկայիս հեղձուկ իրավիճակից հուսադրիչ ու արժանապատիվ ելք ցույց տալը՝ ազգ, որի ուրախության ու հպարտության միակ առարկան այսօր Հենրիխ Մխիթարյանն է»։