Գյումրիում խայտառակ վիճակ է. ջերմաստիճանը նվազում է, ջրի ու կոյուղու խողովակները՝ սառում (լուսանկարներ)

Այսօր Գյումրիում ամենացուրտ գիշերն էր, օդի ջերմաստիճանը նվազեց մինչև – 29 աստիճան:

Ցուրտն ու սառնամանիքն ամենաշատը Գյումրիում զգում են տնակում ապրողները, փայտյա, քայքայված բարակ պատերը չեն կարող պաշտպանել մարդկանց ցրտից: Ինչքան էլ փորձեն վառելափայտի կուտակած պաշարները սպառել, առավոտյան նորից սեղանին դրված մի բաժակ ջուրը սառցակալած կլինի, իսկ կոմունիկացիոն համակարգը՝ չգործող:

Գրեթե նույն վիճակն էր նաև այսօր բազմաբնակարանային շենքերում:

Նույնիսկ անընդհատ ջեռուցելու դեպքում այսօր շատ գյումրեցիների համար առավոտն սկսվեց վատ լուրով՝ սառել են ջրի ու կոյուղու խողովակները: Հատկապես նորակառույց Մուշ 2 թաղամասում խնդիրն անխուսափելի է: Այս թաղամասը 2010-2012թթ. կառուցել է «Գլենդել Հիլզ» շինարարական ընկերությունը. շինարարական բազմաթիվ թերություններից բացի, մոտ 70 շենքում խողովակները մեկուսացված չեն, ու ամենախոցելին են դառնում ջերմաստիճանի նվազման պայմաններում:

Մուշ 2 թաղամասը սպսարկող համատիրության նախագահ Սեյրան Պոլոյանը վիճակը NEWSPRESS.am–ի հետ զրուցում այսպես գնահատեց. «Խայտառակ վիճակ է, ամեն վայրկյան զանգում են, գալիս համատիրություն՝ տեղեկացնելու, թե ջրի կամ կոյուղու խողովակներն են սառել: Անցնող մի քանի օրերին էլի դեպքեր ունեինք ու փորձում էինք նույն օրը հալեցնել, որ ամբողջ շենքի խողովակները չսառեին, բայց այսօր առավոտվանից այնքան են դիմել, որ չգիտենք՝ կհասցնե՞նք արդյոք»: 

Մեկուսացումից բացի, խողովակների սառելու պատճառ են նաև փակ դռները: Մարդիկ արտագաղթել, դուռը փակել ու հեռացել են, մեկ մուտքի 12 բնակարաններից բնակեցված է միայն մեկը, հետևաբար շղթայական սառցակալում են խողովակները, կոմունիկացիոն հանգույցները: Այս պատճառով նույն վիճակն է նաև Անի թաղամասում: Ամեն օր ավելացող փակ դռների ու արտագաղթի պատճառով մեծանում է վտանգը, որ շուտով շարքից դուրս կգան քաղաքի կոմունիկացիոն ցանցերը:

Կենտրոն համատիրության նախագահ Մովսես Ջուհարյանն էլ նշեց. «Հին շենքերում վիճակը մի փոքր բարվոք է, խողովակները դեռ երկաթից են, մեկուսացրել ենք, բացի դրանից էլ, հալեցնելն ավելի հեշտ է, քան մետաղապլաստե խողովակները: Բայց հին շենքերում էլ խողովակներն են քայքայված ու սառելուց հետո, ընդարձակվելուց պայթում են, կոյուղին ու ջուրը լցվում է տները»:

Առավոտվանից մասնագետի օգնությամբ, կամ սեփական նախաձեռնությամբ շենքերի նկուղներում կարելի էր տեսնել մարդկանց, ովքեր կրակ վառած սպասում էին մինչև կբացվեն խողովակները: Նշենք, որ երեք տարի առաջ քիչ չէին դեպքերը, երբ շենքերը դեկտեմբերից մինչ մարտ ջուր ու կոյուղի չունեին սառած խողովակների ցանցի պատճառով: Համատիրությունները չունեն համապատասխան տեխնիկա՝ խողովակները բացելու ու նորմալ ջրամատակարարում ապահովելու համար: