ՀՀ անվտանգությունը պահանջում է, որ «Սպայկան» խնձոր ծախի

«Սպայկան» 56 մլն դոլար է ներդնելու Հյուսիսային Օսեթիայում խնձորի այգիներ և պահեստ կառուցելու համար:

Հիշեցնենք, որ մամուլը բազմիցս գրել է, որ «Սպայկան» գյուղմթերքի արտահանման շուկայում գերիշխող դիրք ունի և գին է թելադրում շուկայում: Հաճախ էր մամուլի էջերում հայտնվում, որ «Սպայկան» գյուղացիներին պարտք է կամ էժան գներով է գյուղմթերքը վերցրել. կարճ ասած` հնարավորության սահմաններում «խաբում-քցում» էին:

Վերջին տարիներին, երբ խոսվում էր արտահանման խթանման մասին, հատկապես գյուղմթերքի արտահանման, լուրեր տարածվեցին, որ այն ժամանակ վարչապետ Հովիկ Աբրահամյանը հայտարարել էր, որ այդ «ծանր» բեռը դրվելու է հենց «Սպայկայի» ուսերին:

Իսկ ո՞ւմ է պատկանում «Սպայկան»: Նախ լուրերին էին պտտվում, որ այն պատկանում է Ռոբերտ Քոչարյանին կամ նրա տղաներին, հետո նաև մամուլում գրվեց, որ բաժնետեր է Միքայել Մինասյանը: Եվ եթե դա այդպես է, ապա Հովիկ Աբրահամյանի հրահանգը բոլորովին զարմանալի չէր: Նաև ունենալով գերիշխող դիրք շուկայում, ազդելով մթերվող, արտահանվող գյուղմթերքի գնի վրա՝ այս ընկերությունն այդպես էլ չհայտնվեց Տնտեսական մրցակցության պաշտպանության պետական հանձնաժողովի տեսադաշտում:

Պարզվում է՝ հիմա էլ այս ընկերության համար Հայաստանի սահմանները քիչ են, ընկերությունը որոշել է Հյուսիսային Օսեթիայում 56 մլն ներդրում կատարել գյուղատնտեսության մեջ: Իսկ հետաքրքիր է՝ Հայաստանի գյուղատնտեսության մեջ որքա՞ն ներդրում է կատարել, բացի գյուղմթերքի մթերումից:

Այժմ էլ «Սպայկայի» նման գործելաոճը գնահատվում է երկրի անվտանգության տեսանկյունից. դե Լարսը փակվում է, իսկ Հայաստանի շահերը պահանջում են, որ Հյուսիսային Օսեթիայում այգիներ հիմնվեն, որ «Սպայկան» անխափան խնձոր ծախի:

Եթե հիշենք, որ դռնեդուռ ընկած ներդրողներ ենք ման գալիս, որ Հայաստանը մեծաքանակ չմշակվող տարածքներ ունի՝ ներդրումների բացակայության պատճառով, ապա «Սպայկայի» այս հայրենասիրությունից ուղղակի շունչ է կտրվում:

Երկրի անվտանգությունը ոչ թե ապահով վայրում ներդրումներ անելը և այդ երկրում աշխատատեղեր ստեղծելն է, այլ կրակի տակ՝ քո երկրում հողատարածքները մշակելը, աշխատատեղեր ստեղծելը, արտահանելը և գյուղատնտեսություն զարգացնելը: Սակայն, չգիտես՝ ինչու, «Սպայկան» որոշել է Ռուսաստանում խնձոր ծախել՝ հանուն հայրենասիրության:

NEWSPRESS.am