Սա բեկումնային տարի է լինելու. Աշոտ Գրիգորյանի շնորհավորական ուղերձը

Եվրոպայի հայկական միությունների ֆորումի նախագահ Աշոտ Գրիգորյանը շնորհավորական ուղերձ է հղել Ամանորի կապակցությամբ, որում, մասնավորապես ասված է.

«Իմ տառապալի Ազգ, պաշտելի Հայ ժողովուրդ:

Սկսվում է մի նոր տարի, որը բեկումնալից է լինելու մեզ համար:

Կանգնած ենք ճակատագրական ընտրության առաջ. կամ փոխելու ենք մեր ներկան և դառնալու ենք հզոր ապագայի տեր և կամ շարունակվելու է խաբեբայության և կեղծիքի մեջ ապրելու, այլոց ողորմությանը սպասող և ձեռքի գործիք դարձած, սեփական եսը կորցրած ու, որպես անկախ պետություն վերանալու իրատեսական վտանգի առջև կանգնած ներկան: Մեր երբեմնի հզոր արդյունաբերական հանրապետությունը, որտեղ չկար գործազրկություն, ծանր և ռազմական արտադրությունները խիստ զարգացած էին, իսկ քիմիական արտադրական հզորություններով աշխարհում առաջիններից էինք, այսօր գտնվում է ողբալի վիճակում. քիմիական արտադրություններն իսպառ վերացել են, մնացյալ արտադրությունները փակվել են, և տնտեսությունը հայտնվել է ողբալի վիճակում: Եվ սա այն դեպքում, երբ մեր տարածաշրջանը դարձել է Եվրասիայի համար կենսական կարևոր ու ստեղծվել են պայմաններ, որոնք հնարավորություն են ընձեռնել կրկին տնտեսության աննախադեպ վերելք ապահովելու և առավել հզոր երկիր դառնալու համար:

Այսօրվա գեոքաղաքականությունն ստիպում է մեզ զարգանալ դառնալով Եվրոպան Ասիայի նետ կապող կարևորագույն կառույց: Բացառիկ մեծ է Իրանի, Չինաստանի և ԵՄ-ի հետաքրքրությունը Հայաստանով տրանսպորտային ուղիների և էներգակիրների տեղափոխման խնդիրների շուրջ: Անչափ մեծ է Ռուսաստանի հետաքրքրությունը ՀՀ-ի նկատմամբ, որպես կարևորագույն ռազմավարական գործընկեր, կապված հարյուրամյակների ավանդույթներով:

Գարնանը սպասվող իշխանափոխության դեպքում հնարավոր է դառնալու մեր երկրի բացառիկ կրավորական դերից՝ բացառիկ ակտիվի անցնելը և արդի մարտահրավերներն ընդունելը: Հայաստանի շուրջ վերջին տարիներին հետաքրքրությունները նվազել են և ԵՄ-ում և Ռուսաստանում, սակայն սպասողական վիճակը գնալով սրվում է. և′ Եվրոպան, և′ Ռուսաստանը հավատում են մեր Ազգի պոտենցիալին և սպասում լեթարգիական քնից արթնանալուն: Շատ մեծ է այդ հարցում մեր Սփյուռքի դերը: Սփյուռքը մշտապես եղել է ուշադրության կենտրոնում իր հզորագույն անհատների շնորհիվ. սա մեր Ազգի առնձնահատկություններից է: Մենք միշտ ունեցել ենք հազվագյուտ անհատականություններ և ոչ բավարար միաբանություն: Հիմա ևս նույնն է. մեր լոբիստները «աստղեր են իջեցնում երկնքից», իսկ համայքները տեղյակ չեն նույնիսկ իրենց առաջնորդների կատարած գործերին: Հայաստանի ճակատագրով խիստ մտահոգված և ակտիվ գործիչներն անում են ամենն, ինչ պետք է մեր արտաքին քաղաքականության առաջընթացն ապահովելու համար:

Նրանք մասնակցում են նաև մեր երկրի ներքին քաղաքական կյանքին և պատրաստվում են առավելագույնս մասնակցելու: Այս առումով 2017ը լինելու է բեկումնային: Արտերկրի հայության գիտակից զանգվածը ընկալում է պահի կարևորությունն, իսկ առավել ակտիվ և հզոր անհատներն իրենց վրա են վերցնելու պայքարն առաջնորդելու խնդիրը: Ստղծվում է այդքան բաղձալի համախմբումը սփյուռքի և մայր Հայրենիքի ակտիվ զանգվածների միջև և սա որոշիչ է լինելու մեր երկրի ապագայի համար: Արցախի հարցում Սփյուռքը և Հայաստանը հազվագյուտ համակարծիքություն են ցուցաբերել միշտ և այժմ էլ այն նույնն է. Արցախը դա Հայաստանն է իր ազատագրված տարածքներով հանդերձ և չկա թշնամում հող զիջելու ոչ մի նախապայման: Հող զիջելը ընկալվում է մեր Ազգի կողմից, որպես բացառիկ դավաճանություն և անփառունակ ապագա է սպասվում նման հային, եթե կգտնվի այսպիսինը:

Սիրելի հայրենակիցներ: Մեր ապագան հստակ է և մենք հաղթելու ենք բոլոր ճակատներում: Մեր դժբախտությունները մնալուն են հին տարվա մեջ և մենք նոր՝ հզոր երկրի հիմքն ենք դնելու այս տարի: Կրկնում եմ. ՍԱ ԲԵԿՈՒՄՆԱՅԻՆ ՏԱՐԻ Է ԼԻՆԵԼՈՒ: Հավատանք մեր ուժերին և նոր տարին սկսենք մեծ ավյունով, բացառիկ հավատով և հույսով, որ մենք փոխելու ենք այս գաղջ իրավիճակն իր գաղջ ռեժիմով ու նոր համակարգ ենք ստեղծելու, անհամեմատելի, առավել առողջ հարաբերություններով համակարգ և նորմալ, քաղաքակիրթ հասարակության ստեղծման հիմքերն են դնելու:

Աստված ուժ տա մեզ և եռանդ: Աստված պահի մեր երկիրն ու մեր Ազգը: