Բաց նամակ ՀՀ առողջապահության նախարար Լևոն Ալթունյանին

Այս բաց նամակը NEWSPRESS.am-ին է տրամադրել նամակագիրը: Այն տպագրում ենք ամբողջությամբ` առանց խմբագրման:

Բաց նամակ ՀՀ առողջապահության նախարար Լևոն Ալթունյանին.

Հարգելի Պարո՛ն նախարար,

Ձեզ գրում եմ՝ հավատալով, որ իմ ձայնը տեղ կհասնի և օրենքի սահմանում կարող ենք ստանալ Ձեր աջակցությունը:

12 տարի առաջ հայրս՝ Ոսկան Պալոյանը, սրտի բարդ վիրահատություն տարավ: Մեր ընտանիքը բաղկացած էր 9 անդամից. հայրս ու մայրս՝ իրենց 7 երեխայով: Ու քանի որ մենք՝ երեխաներով, անչափահաս էինք, իսկ հայրս երկրորդ կարգի հաշմանդամ, մեր ընտանիքը նպաստ էր ստանում: Այսօր այլևս նպաստառու չենք:

Ունեմ եղբայր, ով այսօր համալրում է հայոց բանակի շարքերը, իսկ 2016-ի ապրիլյան քառօրյա պատերազմի ժամանակ էլ ակտիվ մասնակցել է ղարաբաղա-ադրբեջանական սահմանին ընթացող ռազմական գործողություններին: Աչքի է ընկել իր սխրագործությամբ ու պարգևատրվել: Նա այդ օրերին բավականին երկար ժամանակ եղել է դիրքերում:

Այսօր արդեն հորս վիճակը դարձյալ ծանր է: Նա պատրաստվում է երկրորդ վիրահատության, որը ինչպես և առաջինը՝ անցնելու է «Նորք-Մարաշ» բ/կ-ում:

Հորս վիրահատության համար պահանջվում է շուրջ 3 մլն դրամ: Մենք տեղյակ ենք, որ մեր ընտանեկան վիճակն այսօր հնարավորություն է տալիս օգտվել առողջապահության նախարարության կողմից հատկացվող փոխհատուցումից: Բժշկական կենտրոնի ղեկվարությունը մեզ այդ նպատակով տրամադրել է համապատասխան տեղեկանք, որը մեկ շաբաթ առաջ ներկայացրել ենք առողջապահության նախարարություն:

Նամակն ընդունող աշխատակցուհու խորհրդով 5 օր անց հայրս մոտեցել է ստանալու պատասխանը: Նրան հայտնել են, որ մերժել են դիմումը:

Ես՝ Մարթա Պալոյանս, հանդիսանալով Ոսկան Պալոյանի դուստը, խիստ կասկածներ ունեմ, որ մեր դիմումը հասել է Ձեզ՝ պարո՛ն նախարար: Այլապես անհնար էր, որ ծանոթանալով գործին, Դուք՝ որպես առողջապահության նախարար, չտրամադրեիք օրենքով հասանելիք փոխհատուցումը:

Մենք ողորմություն չենք խնդրում և ոչ էլ փորձում ենք խղճմտանք առաջացնել, պարզապես տեղյակ ենք, որ հորս վիրահատության վճարի գոնե մի փոքր մասը, առողջապահության նախարարությունը կարող է փոխհատուցել:

Պարո՛ն նախարար, խնդրում եմ անձամբ ծանոթանալ գործին և մեր խնդրին լուծում տալ: Հայցում եմ Ձեր ողջախոհեմությունը: Նախապես շնորհակալություն:

Մարթա Պալոյան