Կարեն Կարապետյանն օլիգարխների հետ իրեն ապահով ու հանգիստ է զգում

«Մեր տնտեսությունը, ես ասել եմ՝ գտնվում է ծանր վիճակում և այսօր էլ եմ ասում, բայց դա չի նշանակում, որ այն կառավարելի չէ»: Այսօր մամուլի ասուլիսի ժամանակ ասաց վարչապետը:

Նրա խոսքով՝ այսօր մեր տեսության վիճակը մեզ բոլորիս չի բավարարում:

Հարցին, թե անցնող երեք ամսվա մեջ արդյոք կտրուկ փոփոխություններ եղե՞լ են, վարչապետը պատասխանեց, որ փոփոխությունները կտրուկ չեն կարող լինել:

«Ես ձեզ խնդրում եմ, որ հասկանաք, որ տնտեսությունը, այս մեծ համակարգը մեկ օրվա մեջ փոխելու հնարավորություն չկա: Եվ մենք ռեգուլյար ու ամենօրյա աշխատանքով խնդիր ունենք, որ այդ ազդակները տանք, որ մեր քաղաքացիներն զգան, որ մենք գնում ենք ճիշտ ուղղությամբ»,- ասաց վարչապետը:

Կարեն Կարապետյանը նկատեց, որ կառավարությունը պետք է դաշտ ստեղծի, որ Հայաստանում ներդրում կատարելը լինի տրամաբանական ու շահավետ:

«Եթե հողը, որտեղ ուզում ենք սերմ ցանել, քարից չմաքրենք, չփխրեցնենք, չպատրաստենք, այդ սերմը բերք չի տալու: Այդ պատճառով հիմնական խնդիրը, որը լուծում ենք, սերմը ցանելու տեղը պատրաստելն է»,- ընդգծեց վարչապետը:

Հարցին, թե արդյոք օլիգարխների հետ վարչապետն իրեն ապահո՞վ է զգում, վերջինս պատասխանեց, որ այո, օլիգարխների հետ իրեն հանգիստ ու ապահով է զգում: «Եթե ապահով բառի տակ այլ բան չեք տեսնում, այո, թող լինի ապահով»:

Լրագրողի հարցին, թե օրինակ, կարողանո՞ւմ է զանգել ու ասել՝ շաքարավազի գինն ինչո՞ւ է թանկանում, վարչապետը հարցով պատասխանեց. «Ինչպե՞ս եք պատկերացնում, իմ գո՞րծն է զանգել և ջղայն տոնով ասել՝ շաքարավազն ինչո՞ւ է թանկացել: Կարո՞ղ եմ զանգել ու կտրուկ ասել՝ շաքարի գնին ձեռք չտաք»:

Վարչապետը նկատեց, որ չգիտի, թե արդյոք, օրինակ, շաքարը թանկացել է: Ստանալով լրագրողների պատասխանը, թե անգամ ՏՄՊՊՀ-ն է դա հայտարարել, վարչապետն ասաց. «Բա ինչո՞ւ չեք ասում, որ միջին գներն ընկել են: Ինչո՞ւ հարց չեք տալիս մնացածի վերաբերյալ, որ գինը նվազել է… գնողունակությունը չի եղել ավելի վատ, քան նախորդ տարի»,- ասաց նա: