Արամ Դանիելյանը «ցմահ» դատապարտված է (լուսանկարներ)

Դեռ նախորդ տարվա ապրիլին կայացած ՏԻՄ ընտրությունների ժամանակ Հրազդանի «ցմահ» քաղաքապետ Արամ Դանիելյանը հայտարարել է, թե քվեարկել է «հանուն կայուն և խաղաղ» Հրազդանի: Քաղաքապետը չի հստակեցրել, որ քվեարկել է՝ ոչ թե Հրազդանի, այլ իր «կայուն եկամտի և խաղաղ կյանքի» համար:

Հանրապետականների «դաբրոն» գրպանում ու իր «խիղճը» ոտքի տակ դրած այս մարդու համար «գռփելն» ու իր տակը դիզելը դարձել է կյանքի նպատակ:

Շուրջ 15 տարի Արամ Դանիելյանն աջ ու ձախ պտտում է Հրազդանի ղեկը՝ իր ճանապարհին ոտնակոխ անելով հրազդանցիներին ու խաղալով նրանց սոցիալական վիճակի հետ, ավերելով ու ոչնչացնելով քաղաքը:

Օրինակ՝ նախորդ տարվա մարտին «Հետք» լրատվական կայքի կատարած հետաքննության արդյունքում պարզվել է, որ Դանիելյանը մսխել է 2016 թ. բյուջեով բնակչության սոցիալական պաշտպանությանը հատկացված 9 մլն 510 հազար դրամի զգալի մասը:

Հատկացումից 2-3 ամիս անց այդ գումարներն արդեն իսկ «տեղաբաշխված» են եղել: «Հետքը» պարզել է, որ ընտանեկան նպաստառուների և եռամսյակային հրատապ օգնության ցուցակներում չկան քաղաքապետի ցուցակում ընդգրկված մեկ տասնյակից ավելի անձանց անուններ, որոնց անհամեմատ մեծ չափերի գումար էր հատկացվել:

Անկեղծ լինելու համար պետք է նշել, այնուամենայնիվ, որ քաղաքապետը որոշ գործեր արել է:

Օրինակ՝ կատարվել են ձնամաքրման աշխատանքներ. ձյան հաստ շերտից ու սառույցից ազատվել է քաղաքապետի՝ գեղեցիկ եղևնիներով շրջապատված առանձնատան շրջակայքը:

Քաղաքում կա բավականին հաջողված խոշոր գազալցակայան, որն աշխատում է միայն ու միայն քաղաքապետի ջանքերով, քանի որ դա ևս պատկանում է իրեն:

Ֆրանսիայում ձեռք է բերվել գեղեցիկ առանձնատուն, որն Արամ Դանիելյանը «նվիրաբերել է» ինքն իրեն:
Քաղաքապետը շտապօգնության ծառայությանը տրամադրել է 3 մեքենա, որոնցից մեկի բերանում իսկի շունչ չկա, մյուս երկուսի գոյության մասին էլ աշխատողները միայն լսել են, բայց աչքով չեն տեսել:

NEWSPRESS.am-ի հարցումը, թե որտեղ է այդ երկու մեքենան, շտապօգնության բուժաշխատողներին խուճապի մատնեց՝ մինչև իսկ այնքան, որ նրանք զավեշտալի պատասխան տվեցին, թե «գարաժում կանգնեցրել են, որ չսառչի…»: Իսկ թե որտեղ է այդ «գարաժը», նրանք չգիտեին: «Դա պետական հիմնարկ է, մենք տեղը չգիտենք…»,- ասացին նրանք:

Հրազդանցիներն այս մասին սև հումոր են անում նույնիսկ, թե Հրազդանը մի հատ շտապօգնության մեքենա ունի, այն էլ՝ միայն դիակ է տանում…

Դե եթե շտապօգնության միակ մեքենան միայն դիակներ է տանում, հետևաբար քաղաքին հիվանդանոց էլ հարկավոր չէ, ու Հրազդանի հիվանդանոցի տնօրեն Ռոբերտ Սահակյանն էլ, քաղաքապետի թեթև ձեռքով ու, բնականաբար, նրա «դաբրո»-ով իրեն իրավունք է վերապահել հիվանդանոցի ինֆեկցիոն բաժանմունքը վերածել «Ամրոց» կոչվող հանդիսությունների սրահի:

Մի խոսքով՝ քաղաքապետը գործում է «Էս սարն իմն է, էս ծառն իմն է…» սկզբունքով՝ անպատժելիության մթնոլորտում:

Զավեշտալին այն է, որ արդեն 4-րդ անգամ քաղաքապետ ընտրված այս մարդու բացահայտ թալանի ու անգործության մասին տեղյակ են բոլորը, բայց քաղաքապետին, «Խոզն ու ագռավը» հայտնի առակի, հայտնի կենդանու նման՝ չի անհանգստացնում այն, որ թալանելով ոչ թե կզորացնի քաղաքը, որտեղ ապրում է, այլ կչորացնի այն. բայց իրեն ի՞նչ՝ չորանա, «միայն կաղին ունենա, ուտի պառկի գիրանա…»:

NEWSPRESS.am