«Եթե ընտրությունները կեղծվեն՝ կանցնի ՀՀԿ-ն, և երկիրը կմնա փոսի մեջ»

Դուք ինձ ասացեք, թե ինչ կարգի կկեղծվեն ընտրությունները, և ես կասեմ, թե որ ուժերը կմտնեն խորհրդարան:

NEWSPRESS.am-ի հետ զրույցում, անդրադառնալով առաջիկա խորհրդարանական ընտրություններին՝ ասաց ԱԱԾ նախկին պետի տեղակալ Գուրգեն Եղիազարյանը:

Ըստ նախկին պաշտոնյայի՝ Հայաստանում ուժերը չեն անցնում քաղաքական արդար պայքարի պայմաններում: Նրա խոսքով՝ ընտրությունները միշտ կեղծվում են ու, եթե այս անգամ էլ կեղծվեն՝ կհաղթի Հանրապետական կուսակցությունը, թե էլի ո՞ր ուժերը կլինեն ՀՀԿ-ի կողքին՝ Գուրգեն Եղիազարյանը դժվարանում է պատասխանել, բայց վստահ է, որ ՀՀԿ-ի ընտրվելու դեպքում երկիրը կմնա փոսի մեջ:

Իսկ եթե արդար ընտրություններ լինեն՝ առաջին ուժը, որը պայքար կմղի և կհաղթի, ըստ Գուրգեն Եղիազարյանի, պաշտպանության նախկին նախարար Սեյրան Օհանյանն է՝ իր ընկերների հետ, և այն ուժերը, որոնք իրականում կպաշտպանեն Կարեն Կարապետյանին:

«Ես չեմ կարող ասել, թե կոնկրետ ում կպաշտպանի Սեյրանը, բայց չեմ մտածում, որ կպաշտպանի Սերժ Սարգսյանին: Օհանյանը մեծ պոնտենցիալ ունի, ես նրան շատ մեծ տեղ եմ տալիս՝ իր ապագայով ու անցյալով: Մեր Հանրապետությունում մի ընտրազանգված էլ մեծ հավատ ունի Կարեն Կարապետյանի նկատմամբ»,- նշում է ԱԱԾ նախկին պետի տեղակալը:

Դիտարկմանը, թե ժամանակին նա քննադատել է Սեյրան Օհանյանին, Գուրգեն Եղիազարյանն արձագանքեց, որ քննադատել է այն ժամանակ, երբ նա Սերժ Սարգսյանի հետ նույն թիմում էր:

«Այսօր Օհանյանն ուժ է գտել իր մեջ և հրաժարվել այդ թիմից, որը երկրին միայն կործանման է տարել»,- ասաց Գուրգեն Եղիազարյանը:

Իսկ հարցին, թե չի՞ կարծում, որ Սեյրան Օհանյանին հեռացրել են իր պաշտոնից՝ հաշվի առնելով նաև քաղաքական դաշտում ձևավորված այն տեսակետը, որ Հայաստանում ոչ ոք իր պաշտոնից ինքնակամ չի հրաժարվում, նախկին պաշտոնյան պատասխանեց. «Չէ, ինչի՞… օրինակ՝ ես հրաժարվել եմ, Սեյրան Օհանյանը հրաժարվել է…»:

Ինչ վերաբերում է ԲՀԿ հիմնադիր Գագիկ Ծառուկյանի վերադարձին, ապա, ըստ Գուրգեն Եղիազարյանի, ժողովուրդն սպասում էր նրան: «Առանց նրա քաղաքական դաշտը կատարյալ չէր լինի»,- նկատում է մեր զրուցակիցը:

Հարցին, թե քաղաքականություն վերադառնալու մասին Գագիկ Ծառուկյանը խոստացել էր ավելի վաղ հայտարարություն անել, ինչի՞ հետ կարելի է կապել նրա ուշ արված հայտարարությունը, Գուրգեն Եղիազարյանը պատասխանեց. «Ուշ լինի, նուշ լինի… ի՞նչ ա եղել, որ… Գագիկ Ծառուկյանը մաքուր անձնավորություն է, իսկ որպես այդպիսին՝ նրա հետ հեշտ չէր գործարքներ կնքել»: