«Նոտաները լավ չգիտեմ, ռուսերեն չգիտեմ, բայց էդ ամեն ինչն իմանալով՝ ինձ տանում են». մանկատուն եկած աղջկա երազանքը կատարվում է (ֆոտո)

Գյումրիի Ֆ. Նանսենի անվան երեխաների խնամքի կենտրոնի բոլոր 90 սաներն ուրախացել են իրենց ընկերոջ՝ Անգելինա Պապիկյանի հաջողությամբ: Շուտով նա մեկնելու է Ռուսաստան՝ իր երազանքի հետևից: Հաստատության սաները նրան քաջալերում են, բայց նաև իրենք են հույսով լցվում, որ անակնկալներ ու հեքիաթներ լինում են կյանքում, պետք է միայն պայքարել ու սպասել այդ ակնթարթին:

Անգելինային ու եղբորը մայրը 2006 թվականին է մանկատան դաստիարակների խնամքին հանձնել, երբ մահացել է հայրը: Այն ժամանակ Ֆ. Նանսենի խնամքի կենտրոնը «Հույս» մանկատուն էր: Անգելինան ընդամենը 6 տարեկան է եղել: Մայրը Հռիփսիմե Սիմոնյանը NEWSPRESS.am-ի թղթակցի հետ զրույցում ասել է, թե ինչն է նրան դրդել երեխային բերել մանկատուն. «Մենք մանսարդում կապրեինք, չունեինք հնարավորություն, դոմիկի պես էր, չէինք կռնա ապրել էդ փոքր տեղը, ու բերեցի էս հաստատություն, մտածեցի, որ իրա համար լավ կեղնի»:

Անգելինան էլ է հիշում, թե ինչպես օրերով տխրել է, մորից բաժանումը ծանր տարել. «Սկզբում լացում էի, դաստիարակներին ասում էի՝ մամային կուզեմ, տուն կուզեմ գնամ, բայց երկու շաբաթ հետո արդեն սովորեցի ու հասկացա, որ մաման ճիշտ է»:

Մի քանի տարի է՝ «Հույս» մանկատունը դարձել է երեխաների խնամքի կենտրոն, ու Անգելինան արդեն կարող է շաբաթ-կիրակի օրերին գնալ տուն, բայց շաբաթվա սկզբին նորից վերադառնալ խնամքի կենտրոն:

Դժվարություննե՞րն են կոփել, թե՞ արդեն ներքին խառնվածքի դրդումով Անգելինան ձգտել ու ձգտում է հասնել իր նպատակներին: Երգել, պարել ասեղնագործել… փորձում է ամեն ինչ սովորել ու դառնալ առաջինը: Մի մեծ ցանկություն է ունեցել, մասնակցել երգի որևէ մրցույթի, ուժերը փորձել ու հղկվել… Բայց հնարավորություններն ու ցանկությունները ոչ միշտ են համընկել: «10 տարի է՝ իրա հետ աշխատում եմ, Անգելինան շատ շուտ ամեն ինչ ընկալում է, ընդունակ երեխա է, փոքրուց սկսել է երգել, պարի խմբի հետ պարում էր, երգի խմբի հետ երգում ու էսպես Անգելինաս հաղթահարեց նախնական փուլերը»,- նշեց հաստատության աշխատակից Մարիամ Չեռնամորյանը:

Անգելինան հաղթահարել էր երգի մրցույթի նախնական փուլերը ու փետրվարի 19-ին մասնակցելու է НТВ հեռուստաընկերության «Ты- супер!» նախագծին, որն ինքնադրսևորվելու հնարավորություն է տալիս տաղանդավոր երեխաներին: Շոուին կարող են մասնակցել մանկատների, ինտերնատների սաներն ու որդեգրած երեխաները:

ԱՊՀ և Բալթյան տարածքի երաժշտական տաղանդները կժամանեն 9 երկրից, որոնց թվում են նաև Հայաստանը, Բելառուսը, Վրաստանը, Մոլդովան, Ղազախստանը, Ղրղզստանը և Էստոնիան:

NEWSPRESS.am-ի թղթակցի հետ զրույցում Անգելինան պատմեց, որ լսումները կատարվել են համացանցով, երկու երգ են հանձնարարել, թեև հիվանդ է եղել, բայց մարմնի բարձր ջերմությունը չի խանգարել ու «Դլե յաման» երգով հնարավորություն է ստացել մասնակցելու երգի մրցույթին:

«Ես չգիտեի ընդհանրապես էդ մասին, բայց միշտ պատկերացնում էի, որ կմասնակցեմ հեռուստատեսությամբ ցուցադրվող երգի տարբեր մրցույթներին, բայց դրա համար հնարավորություն է պետք, միջոցներ ու ժամանակ, իսկ հիմա ես գնում եմ Մոսկվա ու բոլոր ծախսերը հոգում են, ճանապարհածախս, զգեստներ, իսկական երազանք է»,- նշում է Անգելինան ու հավելում. «Ես չէի սպասում, ես երաժշտական քիչ եմ գնացել, նոտաները լավ չգիտեմ, ռուսերեն չգիտեմ, բայց էդ ամեն ինչը իմանալով` ինձ տանում են»:

Անգելինայի նպատակն է`լինել երգի ասպարեզում, ու ինչպես ինքն է նշում, նպատակասլաց է ու փորձելու է երգեցողությունը հղկել, կարևորում է նման սատարող ու ոգևորող նախագծերը. «Մեր կենտրոնի երեխաները լքված են, ոչ բոլորն ունեն ծնողներ կամ ունեն տատիկ, շատ հաճելի է, որ նման հնարավորություններ լինեն, ոչ միայն այս, այլև տարբեր բնագավառներում կուզենայի, որ դժվար կացության մեջ գտնվող երեխաներին օգնեն»:

Ծրագիրը տևելու է երեք ամիս: Անգելինայի հետ մեկնելու է ևս մեկ մասնակից՝ Սաբինա Մանվելյանը Վանաձորից: Անգելինայի ցանկությունն է՝ տեսնել իր սիրած երգիչներին ու եթե հնարավոր է՝ զուգերգով նաև հանդես գալ: Մայրը ևս հույսեր է կապում աղջկա հետ, վստահ է, որ դուստրն իր աշխատասիրությամբ ամեն ինչ կանի իր երազանքին հասնելու համար:

«Իրա համար թազա կյանք բացվավ, շատ հույսեր ունի, 180 աստիճանով կփոխե իրա կյանքը: Ես հիմա շատ ուրախ եմ, որ իրա երազանքն ու իմ երազանքը կկատարվի, եթե իմ կողքս եղներ, էսպես հնարավորություն ոչ էլ կեղներ»,- նշեց Անգելինայի մայրը: