Իշխանությունը փող է բաժանում՝ գա իշխանության, գալիս է իշխանության` փող ստանա. Արամ Սարգսյան

Փոփոխությունը միանշանակ լինելու է, բայց մենք հակված ենք անցնցում փոփոխությունների: «Ելք» դաշինքի այսօրվա համաժողովում հայտարարեց «Հանրապետություն» կուսակցության ղեկավար Արամ Սարգսյանը:

Հիշեցնենք, որ «Ելք» դաշինքի կազմում են «Լուսավոր Հայաստան», «Քաղաքացիական պայմանագիր» և «Հանրապետություն» կուսակցությունները: Նրանց կարգախոսն է՝ ընտրություն, փոփոխություն, հաղթանակ:

Արամ Սարգսյանն իր ելույթում նկատեց, որ, սովորաբար, եթե փոփոխությունը ծանրակշիռ է՝ փոխվում է պատմությունը ու իրենց նպատակն էլ հենց պատմությունը փոխելն է:

«Մենք ուզում ենք փոխել պատմությունը՝ ելք տալ: Այս ընտրություններում մենք չենք կրկնելու այն, ինչ պիտի չանեինք, անելու ենք այն, ինչ չենք արել մինչև հիմա»,- հայտարարեց նա:

Նա նշեց, որ նոր ընտրակարգով իշխանությունը Հայաստանը բաժանել է 13 մասի, ամեն մասում ներգրավել է մեկ, որոշ դեպքերում մի քանի պետության ռեսուրսների օգտագործմամբ ու կոռուպցիայի շնորհիվ հարստացած դոլարային միլիոնատերերի: Նա կարծիք հայտնեց, որ ընտրության այլ տարբերակ իշխանությունը չունի, քանի որ արդար ընտրությամբ հանրությունից քվե ստանալն իրենց դեպքում չի աշխատելու:

«Այս իշխանությունը փող է բաժանում, որ գա իշխանության, գալիս է իշխանության, որպեսզի փող ստանա: Եվ իրենք այնքան են ինքնավստահ փողի տարբերակի և նոր ընտրակարգի վրա, որ համաձայնել են ընտրությունների վերահսկման՝ ընդդիմության առաջարկած տարբերակին, այդ թվում՝ տեսանկարահանումները և մասնակիցների ցուցակների հրապարակումը»,- նշեց նա:

Արամ Սարգսյանը հարցադրում արեց՝ իսկ ի՞նչ այլընտրանք ունի հայ ընտրողն այսօր: «ՀՀԿ-ն ասելու է՝ ամեն ինչ լավ է, իրեն ընտրելու դեպքում ավելի լավ է լինելու ու փող են բաժանելու: Ոչ իշխանություններն ասելու են՝ վատը ՀՀԿ-ն է և Սերժ Սարգսյանի շրջապատը և նորից փող են բաժանելու: Կան նաև ուժեր, որ կասեն՝ երկրի վիճակն աննկարագրելի վատ է, իշխանությունը դավաճան է, բայց այդ ուժերը մեկ տարի կամ մի քանի օր առաջ են դուրս եկել Բաղրամյան 26-ի շքամուտքից, իսկ հետնամուտքից ելումուտ են անում»,- ասաց նա:

Արամ Սարգյսնաի խոսքով՝ այս բոլոր ուժերն ունեն մեկ ընդհանրություն՝ Հայաստանի ինքնիշխանությունն ու անկախությունը սիրով ու անմոռաց նվիրել են Ռուսաստանին և մեր երկրի ներկան ու ապագան տեսնում են Բելառուսի, Ղազախստանի շրջապատում ու մոդելով: Անգամ որոշ կուսակցապետեր Արցախի հարցի լուծումն առաջարկում են «Լավրովյան պլան» կոչվածով, միայն թե Մոսկվային ցույց տան, որ իրենք ավելի լավ կծառայեն նրան, քան իշխանությունը:

«Նայելով այս ուժերին՝ ակնհայտ ու պարզ է դառնում, որ ելքը մենք ենք… Հաղթում է ոչ թե նա, ով հարուստ է ու մեծ ռեսուրսներ ունի, այլ նա, ով ոգով է ուժեղ»,- ասաց Արամ Սարգսյանը: