Պետք է խաղաղ ու անցնցում իշխանափոխություն լինի Հայաստանում. Մարուքյան

Մենք միավորվել ենք, որպեսզի յուրաքանչյուր իրավիճակից ելք գտնենք: «Ելք» դաշինքի համաժողովին այդ մասին ասաց «Լուսավոր Հայաստան» կուսակցության առաջնորդ, «Ելք» դաշինքի ներկայացուցիչ Էդմոն Մարուքյանը:

Նրա խոսքով՝ դաշինքի ծրագիրը երկար քննարկումների փուլ է անցել, մշակվել են ծրագրային հիմնադրույթներ, որոնք բացվելու և ներկայացվելու են նախընտրական ծրագրի տեսքով:

Ըստ Մարուքյանի՝ շատերը կարծում են, որ անհնար է ընտրությունների միջոցով Հայաստանում ինչ-որ բան փոխել:

«Իշխանությունն ասում է՝ մեկ ա, մնալու ենք մենք, խնդիրները լուծելու ենք… է, լուծող էիք, 17 տարի իշխանության ղեկին եք, լուծեիք: Մենք ասում ենք՝ ընտրությունների միջոցով հնարավոր է ինչ-որ բան փոխել… «Ելք» դաշինքն ապագայի դաշինք չէ, այլ այսօրվա, որովհետև մարդիկ այսօր են փոփոխություն ուզում»,- ընդգծեց Մարուքյանը:

Նա նշեց նաև, որ լրագրողներն անընդհատ հարցնում են, թե կմիանա՞ք այսինչին կամ այնինչին և ընդգծեց, որ «Ելք» դաշինքը չի ստեղծվել՝ այսինչին կամ այնինչին միանալու համար:

«Դաշինքն ստեղծվել է միավորման աշխատանքներ, ներառական գործընթացներ տանելու և ընտրությունների միջոցով հաղթանակ արձանագրելու ու փոփոխություններ բերելու համար»,- ասաց Մարուքյանն ու հավելեց, որ եթե իշխանությունները չեն կարողացել փոփոխություն անել երկրում՝ պետք է հեռանան:

«Պետք է խաղաղ ու անցնցում իշխանափոխություն լինի Հայաստանում»,- ասաց նա: