ՀՀ ժողովուրդը մեզանով հաղթելու իրական հնարավորություն ունի. Փաշինյան

«Մենք այստեղ ենք որպես երաշխավոր՝ ի կատար ածելու ՀՀ քաղաքացու կայացրած այն որոշումը, որով նրանք կընտրեն ընտրությունը, փոփոխությունը, հաղթանակը»: «Ելք» դաշինքի համագումարում այդ մասին հայտարարեց «Քաղաքացիական պայմանագիր» կուսակցության անդամ Նիկոլ Փաշինյանը:

Նա նշեց, որ ՀՀ ժողովուրդը իրենցով հաղթելու իրական հնարավորություն ունի:

«Հենց այսօր պետք է ստեղծել այնպիսի Հայաստան, որտեղ վերադառնում են, ոչ թե որտեղից փախչում են… Հայաստանի կառավարությունը հինգուկես ամիս է՝ ասել է, որ ինքը կոտրելու է բանանի մենաշնորհը և չի կարողանում: Եվ ես հիմա հասկանում եմ, մենք բոլորս սխալվել ենք, որ իմացել ենք, թե բանանի մենաշնորհը Միհրան Պողոսյանինն է: Հայաստանում բանանի, շաքարի, բենզինի ամեն ինչի մենաշնորհը մեկ մարդունն է, դա Սերժ Սարգսյանն է: Եվ ինքն ամեն անգամ այս ընտրությունները կազմակերպում է մեկ նպատակով՝ բանան ներկրելու իր իրավունքն անձեռնմխելի պահելու համար»,- ասաց Փաշինյանը:

Նա նշեց, որ վարչապետ Կարեն Կարապետյանին էլ չի հաջողվում ամիսներ շարունակ կոտրել բանանի մենաշնորհը, իսկ «Ելք» դաշինքին դրա համար անհրաժեշտ է լինելու ընդամենը 47 րոպե:

«Շատերն ասում են՝ ինչպիսի՞ն է ձեր պատկերացրած պետությունը: Մեր պատկերացրած պետությունն այնպիսին է, որն արթանում է ոչ թե առավոտ 8:30-9:00-ին, այլ վեցին, որտեղ կոկիկ ու մաքուր ավտոբուսներն ու տրոլեյբուսները հարյուր հազարավոր բանվորներին տանում են նրանց աշխատավայրը, որտեղ մարդիկ արտադրությամբ են զբաղվում: Սա մի երկիր է, որը պատրաստ է ունենալ բարձր որակի ռազմարդյունաբերություն ու պաշտպանել ինքն իրեն՝ անկախ նրանից՝ հյուսիսում, հարավում, արևմուտքում ու արևելքում ինչ կորոշեն»,- հայտարարեց Նիկոլ Փաշինյանը: