Սերժ Սարգսյանն ինքն է «սցենարի» հեղինակը

Այն, որ ՀՀԿ-ն ճաքեր տալիս է, ԳԽ նախկին պատգամավոր, նախկին քաղբանտարկյալ Ազատ Արշակյանի համար ակնհայտ է, բայց նա այդտեղ նաև հին ու նոր սերնդի պայքար է տեսնում:

Ազատ Արշակյանը NEWSPRESS.am-ի հետ զրույցում նկատեց, որ ռոտացիա պետք է լինի ոչ միայն իշխանական համակարգում, այլև ներկուսակցական. դա, ըստ նրա, անհրաժեշտություն է:

Ազատ Արշակյանը նշում է, որ այստեղ կարևոր նշանակություն ունի նաև կարկանդակի փոքրությունը. ախորժակները որքան մեծանում են, կարկանդակն այնքան փոքրանում է:

«Կարկանդակը, որի վրա հաշվարկներ էին անում նախկին ՀՀԿ-ականները, բավականին փոքրացել է և չի բավարարում: Ախորժակները մեծ էր և ավելի է մեծանում՝ մարսողական է, իսկ կարկանդակը փոքր է: Բնականաբար, պետք է մրցակցություն լինի կարկանդակի համար, որտեղ ավելի թույլերն ու ինտրիգներին անպատրաստները դուրս կմղվեն քաղաքական մրցաշարից ու քաղաքական հարթակից»,- ասում է Ազատ Արշակյանը:

Ամեն դեպքում, նա չի կարծում, որ երկրում տիրող քաղաքական իրավիճակը վերահսկողությունից դուրս է: Ազատ Արշակյանը նկատում է՝ իրավիճակը կառավարելի է, քանի որ Սերժ Սարգսյանն ինքն է «սցենարի» հեղինակը:

«Հանրապետական կուսակցության նախագահը նաև «սցենարիստ է»: Այս իմաստով՝ իրավիճակը կառավարելի է, քանի որ ինքն է բաժանում կարկանդակը, ինքն է ապահովում ռոտացիան, ինքը գլխավոր «սցենարիստն» է: Ներքին մրցակցության, կոնկուրսի մեջ, սակայն, ինքն ազատություն է տալիս դերակատարներին. ով հաղթի՝ նա կմնա: Հնարավոր է՝ ունի հովանավորյալներ, բայց մյուսներին ասում է՝ պայքարեք ձեր տեղի համար»,- նկատում է մեր զրուցակիցն ու ընդգծում, որ պայքարի տարբեր ձևեր կան. դրանցից մեկը հավատարմությունն է, որի դրսևորումը, Ազատ Արշակյանի խոսքով, հիմա ամենագլխավորն է:

Նա չի կարծում, թե ձևավորված դաշինքները (Ծառուկյան դաշինք, Օհանյան-Օսկանյան դաշինք և «Ելք») մտնում են Սերժ Սարգսյանի սցենարի մեջ: Ազատ Արշակյանի դիտարկմամբ՝ Հայաստանը համեմատաբար ժողովրդավարական երկիր է, և պետք է լինի նախընտրական պայքար, լինեն դաշինքներ, հավակնորդներ. «Սա Սերժ Սարգսյանի հորինածը չէ, բայց նա այդ խաղի կանոններն ընդունել է, ինքը խաղացողներից մեկն է և ամենաուժեղը»:

Պատասխանելով հարցին, թե ի՞նչ զարգացումներ կարելի է ակնկալել նման իրավիճակում, Ազատ Արշակյանը նկատում է՝ եթե ամեն ինչ իր հունով գնա, ինչպես որ հիմա թվում է, մենք կտեսնենք իշխանության վերարտադրությունը՝ աննշան շեղումներով: Միևնույն ժամանակ նա չի բացառում նաև, որ կլինեն անակնկալներ՝ թելադրված դրսից:

«Այդ անակնկալները հայկական ծագում չեն ունենա, դրանք կլինեն դրսից հրահրված, և կունենանք ակտիվ ու աշխույժ մայիս ամիս»,- եզրափակեց Ազատ Արշակյանը: