Մեզ համար հսկայական ցավ է զինվորի ինքնասպանությունը. Վիգեն Սարգսյան

Անկախ ամեն ինչից՝ ընտանեկան դիրքից, սոցիալական վիճակից, ցանկացած զինվորի մահ, դժբախտ պատահար կամ ինքնասպանություն չափազանց մտահոգիչ և շատ ծանր ընդունվող լուր է: Լրագրողների հետ հանդիպմանն այդ մասին ասաց ՀՀ պաշտպանության նախարար Վիգեն Սարգսյանը՝ անդրադառնալով Տավուշի մարզում զինվորի ինքնասպանության դեպքին և այն լուրերին, թե նա եղել է ծնողազուրկ և գտնվել է մարտական դիրքում։

Նա նշեց, որ ըստ իրեն զեկուցած նյութերից՝ զորակոչի որևէ խախտում չի եղել, բայց քննությունը շարունակվում է:

«Մեզ համար հսկայական ցավ է զինվորի ինքնասպանությունը, բայց վիճակագրությունն ուսումնասիրելով՝ տեսել եմ, որ Զինված ուժերում նույն տարիքային խմբի ինքնասպանությունների թիվը գրեթե չորս անգամ պակաս է ԶՈւ-ից դուրս գտնվող ինքնասպանությունների թվից: Թեև դրանով երևույթը չի արդարացվում, սակայն թվեր իմանալը շատ կարևոր է»,- ասաց նա:

Ըստ նախարարի՝ դա նշանակում է, որ հրամանատարական վերահսկողությունը, հոգեբանի, անձնակազմի աշխատանքը, որոշակի արդյունք տալիս են: Նա սխալ է համարում այն կարծիքը, որ բանակը հասարակության հայելին պետք է լինի, և ինչ խնդիր կա հասարակությունում, պետք է լինի բանակում:

«Բանակում կան բազմաթիվ գործիքներ, և մենք պետք է լինենք քաղաքացու կերտման դպրոց ու դարբնոց. այդ ճանապարհին անելիքներ ունենք»,- նկատեց Սարգսյանը: