Առանց Սերժ Սարգսյանի՝ ոչ մեկս չէինք հասնի պաշտոնի. Սուրիկ Խաչատրյան

Դա բնության օրենքն է, որ առվակները գետերից անջատվելով՝ չորանում են: Դա Սերժ Սարգսյանը չի հորինել, դա բնության օրենքն է: Այսօր հունվարի 28-ին՝ Հայոց բանակի օրվա առթիվ «Եռաբլուր» պանթեոն այցելության ժամանակ լրագրողների հետ զրույցում ասաց Սյունիքի նախկին մարզպետ Սուրիկ Խաչատրյանը (Լիսկան)՝ անդրադառնալով ՀՀԿ խորհրդի նիստում Սերժ Սարգսյանի հայտարարությանը:

Հարցին, թե ինչո՞ւ են Սեյրան Օհանյանն ու Հովիկ Աբրահամյանն իշխանությունից ու Սերժ Սարգսյանից նեղացած, Սուրիկ Խաչատրյանը պատասխանեց. «Իրանք Սերժ Սարգսյանից նեղանալու իրավունք չունեն: Սերժ Սարգսյանը յուրաքանչյուրի վրա իր լուման ունի դրած: Առանց Սերժի իրանք էլ, ես էլ, չէինք հասնի պաշտոնի»:

Հիշեցնենք, որ ՀՀԿ խորհրդի նիստում ՀՀ նախագահ Սերժ Սարգսյանն անդրադառնալով խոսակցություններին, թե ՀՀԿ-ից արտահոսք կա, հայտարարել էր. «Ուզում եմ այս թեմային արձագանքել փոխաբերաբար: Գիտեք՝ մայր գետերը, առաջընթաց են ապահովում իրենց հոսքի ողջ երկայնքով, կյանք են տալիս, հաց են տալիս, ջուր են տալիս, և այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում ու գնում են: Սա է բնության օրենքը, և որևէ մեկը մեզնից չի կարող հակադրվել բնության օրենքներին, մենք կարող ենք փորձել կառավարել, կարգավորել, բայց, ըստ էության, այսպես է լինելու»:

Հովիկ Աբրահամյանը պատասխանել էր Սերժ Սարգսյանին՝ ֆեյսբուքյան իր էջում գրելով հետևյալը. «Գետերի և առվակների փոխաբերությունը լավն էր: Ինքս էլ հավանել եմ: Չմոռանանք նաեւ, որ մայր գետերը ոչ այլ ինչ են, քան ինքնամոռաց առվակների միավորում: Բայց ինչ-որ պահից գետ լցվող տեխնոլոգիական գործարանի խառնուրդային ջրերը կմխտռեն ողջ մայր հունը, անպիտան կդառնա ամբողջը: Միգուցե մինչ այդ պոկված՝ դեռ սեփական հողի հոտը կրող առվակները, մինչև ոչնչանալը, հասցնե՞ն գոնե մեկ-երկու բնակավայրի կյանք պարգևել»: