Կենսագրությունը չեն գրում գրիչով գրասենյակում, այլ խրամատում՝ արյունով ու քրտինքով. Շիրակում նշել են Հայոց բանակի 25-րդ տարեդարձը (լուսանկարներ)

Հայկական բանակի կազմավորման 25-րդ տարեդարձի առթիվ ՀՀ Շիրակի մարզպետարանի, Գյումրիի քաղաքապետարանի և ՀՀ պաշտպանության նախարարության Շիրակի կայազորի համատեղ ուժերով Վարդան Աճեմյանի անվան պետական դրամատիկական թատրոնում կազմակերպվել էր տոնական միջոցառում:

Ինչպես տեղեկացնում է NEWSPRESS.am-ի Շիրակի մարզի թղթակիցը, Հայոց բանակի 25-րդ տարեդարձի առթիվ Շիրակի մարզի տարածքում տեղակայված՝ ՀՀ պաշտպանության նախարարության N զորամասերի լավագույն զինծառայողներն արժանացան Շիրակի մարզպետի պատվոգրերին ու հուշանվերներին:

Զորամասերը պատվոգրերի և անվանական ժամացույցների արժանացան նաև Գյումրիի քաղաքապետ Սամվել Բալասանյանի կողմից: «Հայաստանը երբեք նման մարտունակ բանակ չի ունեցել: Այն այսօր տարածաշրջանում ամենամարտունակն է: Սա մեր բոլորի հաղթանակն է: Պետք է կարողանանք հիշել այն անցած ճանապարհը և բոլոր նրանց, ովքեր կանգնած էին Հայոց բանակի ստեղծման ակունքերում»,- իր խոսքում նշեց Սամվել Բալասանյանը:

Մարտունակ և հզոր բանակի մասին ֆիլմերը պատմում էին Հայոց բանակի անցած ուղին, հպարտության ու անցած դժվարությունները հաղթահարելու զգացումը համակել էր հանդիսատեսին, բայց այն պահին, երբ «Երկրապահ» կամավորականների միության պատվոգրերով պարգևատրվեցին ապրիլյան պատերազմում զոհված զինվորների ծնողները, բոլորի աչքերն արցունքով լցվեցին ու հոտնկայս ծափահարությունները չէին դադարում։ Սա այն կենսագրությունն էր, որ գրվել էր ոչ գրիչով. «Կենսագրությունը չեն գրում գրիչով գրասենյակում, այլ խրամատում՝ արյունով ու քրտինքով»,- նշեց Յուրա Մովսիսյանը։

«Բանակի մասին պետք չէ խոսել երրորդ դեմքով, բանակը մեզնից դուրս չէ, բանակը մեր մեջ է, մենք նրա մեջ։ Ամեն մեկս պարտավոր ենք նույնքան, որքան զինվորն ու սահմանապահը, լինի աշխարհիկ, թե հոգևորական, պարտավոր են լինել նույնքան պարտաճանաչ, նույնքան անձնազոհ մեր գործերում, որքան սահման պահող զինվորը։ Մեզանից յուրաքանչյուրն էլ պետք է լինի քրիստոնեության սահմանապահը, քրիստոնեական արժեքների կրողն ու բարոյական արժեքների պահապանը։ Եվ եթե մենք լինենք անձնազոհ ու նվիրյալ մեր առաքելությանը, կկայանա նաև մեր բանակը։ Բայց Աստված մի արասցե, որ արյան գնով մենք ապացուցենք մեր հայրենասիրությունը»,- այսպես շնորհավորեց, օրհնեց ու իր մաղթանքը հղեց հայրենի բանակին Շիրակի թեմի առաջնորդ Միքայել եպիսկոպոս Աջապահյանը։