«Առավոտ». Օսկանյանը, Սեյրան Օհանյանն ու Տեր-Պետրոսյանը ասելիք ունեն, որ չեն ասում

«Առավոտ» թերթն իր խմբագրականում գրում է.

«Բրիտանական «Էկոնոմիստ Ինթելիջենս Յունիթ» խորհրդատվական ընկերության կարծիքով՝ Հայաստանը 2015 թվականին կիսաավտորիտար էր, իսկ 2016-ին դարձավ ավտորիտար: Չգիտեմ, թե որքանով է այդ ընկերությունը հեղինակավոր և ինչ չափանիշներով է այն առաջնորդվում, բայց, իմ կարծիքով, 2015-ը 2016-ից ավտորիտարիզմի առումով առանձնապես չէր տարբերվում: Ավելին, ինձ թվում է` այդ առումով 1991-2017 թվականներից յուրաքանչյուրը մեկը մյուսից չէր տարբերվում:

Իհարկե, մասնագետներն ավելի գիտական բնորոշումներ կտան, բայց իմ ընկալմամբ՝ ավտորիտար համակարգն այն է, երբ մարդիկ կարող են բողոքել, ընդվզել, բարձրաձայն անեծքներ արտաբերել, զբաղվել ընդդիմադիր քաղաքական գործունեությամբ, քննադատական հոդվածներ և «ստատուսներ» գրել, բայց նրանք չեն կարող ազդել ընդունվող պետական որոշումների վրա՝ այդ «մենաշնորհը» պատկանում է մի փոքրաթիվ խմբի, որը տիրացել է բոլոր լուրջ քաղաքական և տնտեսական լծակներին: Այդ իմաստով հայաստանյան ռեժիմը մշտապես, 25 տարի շարունակ ավտորիտար է եղել:

Դա կարելի է ընդունել որպես փաստ, կարելի է նույնիսկ ցանկալի համարել, ես էլ էի 20 տարի առաջ մտածում, որ պատերազմից հետո, շուկայական հարաբերությունների կայացման փուլում ռեժիմը պետք է ավտորիտար լինի: Գուցեև սխալվում էի: Բայց նրանք, ովքեր արդարացիորեն կարծում են, որ Հայաստանի միակ ճիշտ ճանապարհը ժողովրդավարացումն է, նրանք պետք է արձանագրեն իրողությունը. Հայաստանը երբեք չի եղել ժողովրդավարական, չի եղել անգամ «պակաս ավտորիտար»:

Վարդան Օսկանյանը չի փակել «Ա1+»-ը, գուցե նույնիսկ հոգու խորքում դեմ է եղել դրան՝ դա արել է նրա «շեֆը»՝ Քոչարյանը: Բայց քանի որ հիմա պարոն Օսկանյանը բողոքում է, թե իբր Հայաստանը «պակաս ավտորիտար» երկրից դարձել է «ավելի ավտորիտար», և, հետևաբար, կարևորում է այդ խնդիրը, նա պետք է հրապարակավ ընդունի, որ «Ա1+»-ը փակելը սխալ որոշում էր՝ դրանով, ի դեպ, կապացուցի, որ այդ «շեֆի» հետ այսօր կապ չունի: Նման հայտարարություն ես նրանից երբեք չեմ լսել: Սեյրան Օհանյանը մարտի 1-ին անզեն մարդկանց սպանելու հրաման չի տվել՝ որքան էլ փորձեն այսօր հակառակն ապացուցել: (Ի դեպ, ապրիլյան պատերազմի ժամանակ բացահայտված բոլոր թերությունները նրա վրա բարդելը նույնպես սխալ է՝ դրանք ամբողջ պետական համակարգի թերություններն էին): Բայց երբեք չեմ լսել, որ Օհանյանը դատապարտի մարտի 1-ի սպանդը: Եթե կարևորում է խաղաղ հավաքների իրավունքը, ապա պետք է դատապարտի:

Եթե Առաջին նախագահի կողմնակիցները կարծում են, որ մեր երկիրը պետք է գնա ժողովրդավարության ճանապարհով, ապա նրանք պետք է ընդունեն, որ կուսակցություն և թերթեր փակելը, «երկրապահների» կամայականություններին տուրք տալը սխալ էին: Եթե վաղը Արմեն Աշոտյանը և Էդուարդ Շարմազանովը դառնան ընդդիմադիր և սկսեն բողոքել ավտորիտարիզմից, ապա նրանք պետք է սկզբում ընդունեն, որ Շանթ Հարությունյանին 6 տարով դատապարտելը սխալ էր: Հակառակ դեպում ես չեմ հավատա նրանց անկեղծությանը»:

Մանրամասները՝ թերթի այսօրվա համարում