Վարչապետը «մատ թափ տվեց» Սպորտի և երիտասարդության հարցերի նախարարի վրա

«Պարո′ն Ռոստոմյան, առողջ ապրելակերպը, մասսայական սպորտն ի՞նչ եղան»: Այսօր, կառավարության նիստի ժամանակ սպորտի և երիտասարդության հարցերի նախարար Հրաչյա Ռոստոմյանին հարցրեց վարչապետ Կարապետյանը, երբ նախարարը ներկայացրեց մանկապատանեկան սպորտի զարգացման հայեցակարգին հավանություն տալու մասին որոշման նախագիծը:

«Դա հաջորդ հայեցակարգն է, որն անպայման կներկայացվի»,- ասաց Ռոստոմյանը:

Վարչապետը չնահանջեց. «Առանց հայեցակարգի չե՞նք կարող էդ հարցում քայլեր ձեռնարկել»,- հարցրեց նա:

Սպորտի նախարարը պատասխանեց. «Հիմա այս պահի դրությամբ, պարո′ն վարչապետ, արդեն պայմանները, դրսի, որ մի քիչ ցուրտ են, ներս ենք անցել …»:

Նախարարի այս պատասխանն աշխուժացրեց ներկաներին: Բոլորը ծիծաղեցին:

Կարեն Կարապետյանը հարցրեց. «Վիճակագրություն կա՞, թե ընդհանրապես սպորտով զբաղվողների հարցով ձեր քայլերից հետո ինչ է փոխվել»:

«Սպորտով զբաղվողները շատ են, իսկ մասսայական սպորտի ու առողջ ապրելակերպի՝ նույնպես: Համենայնդեպս վերջին տարիներին…»,- նախարարն ուզում էր շարունակել, սակայն վարչապետը նրան կտրուկ ընդհատեց. «Համենայնդեպս ես չեմ զգում, որ դուք այդ ուղղությամբ քայլեր ենք անում: Դա պետք է լսվի, պետք է քարոզվի, պետք է արդյունք տա»,- ասաց Կարեն Կարապետյանը: