Վարդան Ղուկասյանի կոչը. Մարտուն Գրիգորյանին` խաղաղություն, Սամվել Բալասանյանին` խելք, շնորհք ու հարգանք

Երեկ երեկոյան ԱԺ պատգամավոր Մարտուն Գրիգորյանը հայտարարություն տարածեց, որտեղ անդրադարձավ առաջիկա ընտրություններում իր մասնակցությանը՝ մասնավորապես նշելով, որ եթե մի կուսակցության ռեյտինգային ցուցակում Գյումրիի նախկին քաղաքապետն է, չի կարող այնտեղ լինել Մարտուն Գրիգորյանը։ Ու ԲՀԿ-ից դուրս գալը այսպես մեկնաբանեց՝ միաժամանակ մի քանի «թթու խոսքով» բնութագրելով Վարդան Ղուկասյանին ու Գագիկ Ծառուկյանին։

NEWSPRESS.am-ի թղթակիցը զրուցել է Վարդան Ղուկասյանի հետ, ով նախ անդրադարձել է Մարտուն Գրիգորյանի հայտարարությանը. «Մի բան եմ ուզում ասել՝ խաղաղություն, համերաշխություն նրանց հոգիներին։ Աստված ամենալավ բաները թող իրանց տա։ Ես թշնամի չունեմ, իմ թշնամին թուրքն է։ Աստվածաշունչն ասում է՝ երանի խաղաղասերներին, ձեր վարձքը երկնքում մեծ է լինելու»։

Նախկին քաղաքապետը համերաշխության կոչ արեց Մարտուն Գրիգորյանին, իսկ իր մյուս հակառակորդ Սամվել Բալասանյանին կոչն այլ էր՝ «խելք, իմացություն, շնորհք ու հարգանք»։

Չյանած համերաշխության կոչերին՝ Վարդան Ղուկասյանը նաև հավելեց, որ արդեն սկսվել է ընտրապայքարը, ու ամեն մեկն ընտրել է պայքարելու իր ձևը. «Իմ պայքարի ձևն որիշ է, ինչ արել եմ, ժողովուրդը տեսել է, վերհիշեցնելու եմ ու ասելու եմ, թե ինչ եմ անելու, ինչ ճանապարհով եմ գնալու։ Մնացածը գործ չունեն արած, դիմացինին պետք է վարկաբեկեն, հայհոյեն։ Էդ էլ իրանց ձևն է, ամեն մարդ իրա արյունի գյորա պտի խոսա»։

NEWSPRESS.am-ի թղթակցի այն հարցին, թե արդյոք ունի՞ իր ընտրազանգվածը ու քաղաքական կուսակցության փոփոխությունն ի՞նչ կտա, Վարդան Ղուկասյանը պատասխանեց. «Բոլորը գիտեն իմ ռեյտինգը, ժամանակը կուգա, կերևա։ Ես ԲՀԿ չեմ, ես դաշինքով պտի առաջադրվիմ, ես միշտ էլ հոգեպես կուսակցական չեմ եղել, իմ դոշիս Աստծո խաչն է եղել։ Հանրապետական էլ դարձել եմ՝ քաղաքիս շահերից ելնելով»։