«Մենք ընդդեմ չենք, մենք հանուն ենք». ՀՀԿ-ն խոչընդոտ չի հանդիսանա

ՀՀԿ ԳՄ նիստից հետո լրգրողների հետ զրույցում ՀՀԿ խոսնակ Էդուարդ Շարմազանովն անդրադառնալով խորհրդարանական ընտրության օրը փոխելուն, կրկնեց Սերժ Սարգսյանի նախկին խոսքերը՝ եթե ընտրություններին մասնակցել ցանկացող բոլոր ուժերը միասնական կցանկանան փոխել ընտրության օրը, ՀՀԿ-ն խոչընդոտ չի հանդիսանա:

«Մենք մինչև օրս չգիտենք, թե բոլոր դերակատարներն ու մասնակիցներն ովքեր են: Բացի մեկ-երկու ուժից մենք չենք լսել կարծիք, որ նրանք դեմ են ընտրություններն ապրիլի երկուսին նշանակելուն», ասաց նա:

Շարմազանովը նաև կրկնեց, որ ՀՀԿ-ն երբեք անձերի դեմ չի պայքարել, եթե կան կուսակցություններ, ովքեր սատարում են ՀՀԿ-ի ու նախագահի քաղաքական գիծը, ՀՀԿ դռները նրանց առաջ փակ չեն:

Հարցին, թե ՀՀԿ Արարատի մարզային կառույցի ղեկավար ընտրելով Ալիկ Սարգսյանին, արդյոք դրանով նպատակ կա՞ մարզում պայքարել Հովիկ Աբրահամյանի դեմ, Շարմազանովը պատասխանեց, որ ՀՀԿ-ն որևէ քաղաքական գործչի դեմ չի պայքարում, առավել ևս նախկին հանրապետական Հովիկ Աբրահամյանի դեմ:

«Մենք ընդդեմ չենք, մենք հանուն ենք: Մենք ունենք մեր քաղաքական ծրագիրը և անշեղորեն գնալու ենք դրա իրականացմանը: Որևէ պաշտոնյայի նշանակումը մարզում նպատակ չի հետապնդում պայքարելու այս կամ այն պաշտոնյայի դեմ»,- ընդգծեց նա:

Շարմազանովը միաժամանակ ընդգծեց, որ իրենք նորմալ են վերաբերում, որ կլինեն քաղաքացիներ, այդ թվում՝ ազդեցիկ քաղաքացիներ, որոնք չեն լինի ՀՀԿ-ի աջակիցները. «Բայց այն, որ այդ ամենով հանդերձ ՀՀԿ-ն շարունակում է մնալ պառլամենտական ընտրությունների թիվ մեկ ֆավորիտը՝ սա կասկածից վեր է»: