«Ամեն մեկը կբերի իր ախպոր տղին, քրոջ ամուսնուն կամ սիրածին»

Հայաստանում կուսակցությունները քաղաքականապես կայացած չեն: NEWSPRESS.am-ի հետ զրույցում Հայաստանում տիրող նախընտրական վիճակի մասին իր կարծիքը հայտնեց քաղաքագետ Լևոն Շիրինյանը: Նրա դիտարկմամբ՝ այն կուսակցությունները, որոնք 90-ականներին քաղաքականանում էին, դրանք հետընթաց են ունեցել: Քաղաքագետը դրանով է բացատրում այն, որ այսօր Հայաստանը ոչ քաղաքական իրավիճակում է:

«Երբ երկրում կան իշխանության հարցեր, ու դրանք քաղաքականացված չեն, դա ցույց է տալիս, որ երկրում կուսակցությունների անվան տակ կամ մորթու տակ համախմբվել են շահերի խմբեր, որոնք հավաքվում են տարբեր նկատառումներով: Հայաստանում այս գործընթացն է տեղի ունենում՝ խմբավորվում են ըստ շահերի, ըստ հնարավորությունների…»,- ասում է Լևոն Շիրինյանը:

Նա դրանով է բացատրում նաև ՀՀԿ-ից արտահոսքը. «Այդ մարդկանց մի մասը նույնիսկ քաղաքական գործիչ չէ ու քաղաքականությունից բան չի հասկանում, բայց հասկանում է մի բան՝ եթե խորհրդարան չմտավ, ուրեմն ինքը Հանրապետությունում «ոչինչ է»… Մղվում են խորհրդարան, որպեսզի պաշտպանեն:

Կուսակցություններ են ձևավորվում, որոնց դեմքին քաղաքական շունչ չկա, կրթված մարդ էլ չի երևում, հին դեմքեր են՝ կիսամաշված, որ ուղղակի փողկապներ են կապում»,- նշում է Շիրինյանը:

Նա նկատում է նաև՝ Հայաստանը փոքր երկիր է, արնակցական կապերը շատ են, ու դա կդրսևորվի:
«Ամեն մեկը կբերի իր ախպոր տղին, քրոջ ամուսնուն կամ սիրածին, պետք է մեջտեղ քաշեն, չէ՞…»,- ասում է քաղաքագետն ու նկատում, որ ելքը մեկն է՝ պրոցեսը պետք է քաղաքականացվի, որի հավանականությունը, ըստ նրա, 3 % է:

«Երբեմն այդ երեքն ավելի շատ բան կարող են անել, քան մնացած 97-ը, բայց հիմա ժամանակը սուղ է՝ պրոցեսն արդեն սկսված է, ու ժամանակ չի մնացել»,- ասում է Լևոն Շիրինյանը:

Անդրադառնալով Սեյրան Օհանյան-Վարդան Օսկանյան տանդեմին միացած քաղաքական ուժերին, ովքեր, ըստ շրջանառվող լուրերի «օդից կախված վիճակում են», քանի որ ֆինանսական խնդիրներ ունեն՝ քաղաքագետը նկատում է՝ նրանք հնձում են այն, ինչ ցանել են:

«Ես իրականում չգիտեմ՝ ինչ վիճակում է այս դաշինքը, բայց նրանք արժանացել են դրան իրենց քայլերի արդյունքում…. էն որ նախագիծը դրվում էր քննարկման, պետք է ասեին՝ ո՛չ, այս վիճակով մեր երկիրը չի կարող գնալ խորհրդարանական հանրապետության… բայց չասացին, այն ժամանակ իրենք պետք է հրաժարական տային, բայց դա էլ չարեցին, ու հիմա արժանանում են նրան, ինչ արեցին…»,- ասում է քաղաքագետը: