Շիրակի դաշնակցական մարզպետը չի լինելու ՀՅԴ-ի վարկանիշային ցուցակում

Ազգային ժողովի ընտրություններին Շիրակի մարզում «Հայ Հեղափոխական դաշնակցություն» կուսակցությունը ևս դեռ չի հստակեցրել, թե ովքեր են լինելու ռեյտինգային ցուցակում, բայց տարածքային կառույցում մատնանշեցին որոշ թեկնածուների անուններ, ովքեր հաստատ կլինեն ցուցակում: Նրանց թվում է Աշոտ Կուրղինյանը /Գյումրիի Մոր և մանկան Ավստրիական հիվանդանոցի տնօրեն/, Մովսես Մանուկյանը /ՀՀ Շիրակի մարզպետարանի գյուղվարչության պետ/, Հակոբ Մաթիլյանը / ՀՅԴ խմբակցության անդամ, նախկին պատգամավոր/, Արա Հարությունյանը /բժիշկ/, Արծրուն Իգիթյանը /Ախուրյանի գյուղապետ/, լինելու են նաև ոչ կուսակցական թեկնածուններ, որոնց հարցը կուսակցությունը դեռ քննարկում է:

Շիրակի մարզպետ Հովսեփ Սիմոնյանի անունը չի լինելու վարկանիշային ցուցակում:

Հիշեցնենք, որ նախորդ տարվա հոկտեմբերի 2-ի Գյումրիի ՏԻՄ ընտրություններում դաշնակցական կուսակցությունը չկարողացավ հաղթահարել նույնիսկ անցողիկ շեմը: Շրջանառվում էին լուրեր, որ ՀՅԴ Գերագույն մարմինը դժգոհ է կուսակցական մարզպետի աշխատանքից, ու հնարավոր էր պաշտոնանկություն: Հավանաբար ռեյտինգային ցուցակում չընդգրկելը դրանով է պայմանավորված՝ որպես «պատիժ»: Այս մասին նախկին մարզպետն այլ կարծիք ուներ, մասնավորապես նշելով, որ ՏԻՄ ընտրությունների կազմակերպչական թերություններն ու սխալները դաս կլինեն կուսակցության համար, պետք է աշխատել ճիշտ, բոլոր հնարավորությունները պետք է ճիշտ օգտագործել և կուսակցությունն իր ամբողջ ուժով պետք է աշխատի. «Մարզպետը չի ընդգրկվելու, աջակցելու է կուսակցությանը: Մարզպետը մեր ընկերն է, պետք է աշխատի՝ որպես մարզպետ, որպես դաշնակցական աշխատելու է աշխատանքից հետո»,- NEWSPRESS.am-ի թղթակցի հետ զրույցում ասաց նախկին մարզպետ, ՀՅԴ-ական Ռոմիկ Մանուկյանը:

Փոխարենը վարկանիշային ցուցակում ընդգրկվելու է նախկին մարզպետ Ռոմիկ Մանուկյանի անունը, ով ընդգծեց, որ այդ որոշումը եղել է կուսակցական ընկերների որոշումը: Իսկ այն հարցին, թե ո՞ր դաշտում է այս անգամ լինելու ՀՅԴ-ն՝ ընդդիմադի՞ր, թե՞ իշխանամետ, պատասխանեց. «Այսօր մենք կոալիցիայի անդամ ենք ու ընտրություններին ամեն ինչ անելու ենք, որ ունենանք հաջողություն, իսկ եթե Դաշնակցությունն ունեցավ հաջողություն, կարող է համագործակցել տարբեր կուսակցությունների հետ, կարող է էնպես ստացվել, որ Դաշնակցությունն ունենա ընդդիմության կարգավիճակ, կամ շարունակական մնա այսօրվա իշխանության հետ: Իսկ նախընտրական շրջանում իր անելիքների մասին է խոսելու, որևէ այլ կուսակցության քննդատություն չի լինելու, քանի որ լինելով և′ իշխանություն, և′ ընդդիմություն, կարողացել է բարձրացնել բոլոր այն խնդիրները, որոնք կան»:

Իսկ գնահատե՞լ է կուսակցությունն իր վարկանիշը, ունի՞ արդյոք այնքան ընտրազանգված, որ նվազագույն շեմը հաղթահարի՝ առանց դաշինքի, Ռոմիկ Մանուկյանն ընդգծեց. «Մենք այդ մտահոգությունները չունենք, որ կարող է չհայտնվենք Ազգային ժողովում: Մենք ունենք կայուն ընտրազանգված, կախված չէ, թե ընդդիմությունն է, թե իշխանություն, կայուն ընտրազանգվածն ունեցել ենք: Եվ պայքարելու ենք ավելի շատ ձայների ու լուրջ տեղերի համար»: