«Վեր կացեք, նորմալ պատասխանենք. այ քեզ բա՜ն». Բագրատյանը՝ ԿԲ փոխնախագահին

«ԱՄՆ-ում ամեն 10 տարին մեկ թույլ է տրվում կենսաթոշակային հաշիվները կապիտալիզացնել: Սրա ֆոնին Հայաստանը փորձում է իր արժույթը կայուն պահել»,- այսօր ԱԺ նիստի ժամանակ հայտարարեց ԱԺ պատգամավոր Հրանտ Բագրատյանը:

Նա նկատեց, որ Հայաստանի կենսաթոշակային կուտակային համակարգը հղի է արժութային մեծ ռիսկերով:
Նա նշեց, որ կենսաթոշակային բարեփոխումը նախատեսում է 30-40 տարվա ներդրումներ:

«Նման ժամկետով աշխարհում ոչ ոք ներդրումներ չի կատարում, քանի որ գործնականում անհնար է ռիսկերը կանխատեսել»,- ասաց Բագրատյանը:

Նա նկատեց, որ դրամով գները կայուն են, բանկային ակտիվներն աճում են, իսկ դոլարով՝ անխուսափելիորեն արժեզրկվում են:

«Ասում եք՝ համաձայն եք 2020 թվականից հետո մտնել ռուբլու գոտի: Նայեք գոնե, թե ռուսներն ինչպես են կառավարում իրենց արժույթը: Երբ նավթի գինն սկսեց ընկնել, նրանք գոնե խելք ունեցան՝ ռուբլին արժեզրկելու համար: Խելքը բավականացնում է նավթից արժույթը ստերիլացնելու, իսկ հետո, երբ պետք լինի՝ օգտագործելու համար: Իսկ ձեր քաղաքականությունը միանգամայն այլ է: Ի՞նչ եք անելու: Դա Մոսկվայում բացատրեք»,- ասաց Բագրատյանը:

Ի պատասխան նրա՝ Կենտրոնական բանկի փոխնախագահ Ներսես Երիցյանն ասաց. «Կուտակային կենսաթոշակի մասին հարցի քննարկումը պատմություն դարձրիք: Այս պահին համակարգին միացել է 170 հազար մարդ, որից մոտ 100 հազարը մասնավոր հատվածի ներկայացուցիչներն են»,- նկատեց Երիցյանը:
Վերջինիս պատասխանը չգոհացրեց Հրանտ Բագրատյանին. «Ամբոխավարության ոլորտից է էդպիսի բաներ պատասխանելը: Վեր կացեք, նորմալ պատասխանեք ինձ: Այ քեզ բա՜ն»:

ԱԺ նախագահ Գալուստ Սահակյանն էլ, հավանաբար, փորձելով ցրել լարվածությունը՝ նայեց Ներսես Երիցյանին ու Բագրատյանի տոնով կրկնեց. «Այ քեզ բա՜ն»: