Թրամփը բացատրել է, թե ինչու են իր թիմին մեղադրում «ռուսական կապեր» ունենալու մեջ

ԱՄՆ նախագահ Դոնալդ Թրամփը հայտարարել է, որ իր թիմի «ռուսական կապեր» ունենալու մասին պնդումները Հիլարի Քլինթոնի սխալները թաքցնելու փորձեր են: Այդ մասին գրում է ՏԱՍՍ գործակալությունը:

«Այդ անիմաստ հաղորդագրությունները ռուսական կապերի մասին պարզապես փորձ են թաքցնելու այն բազմաթիվ սխալները, որոնք թույլ են տրվել Հիլարի Քլինթոնի նախընտրական քարոզարշավի ընթացքում»,- Թվիթերի իր միկրոբլոգում գրել է Թրամփը:

Ավելի վաղ ամերիկացի անանուն պաշտոնյաները New York Times-ին հայտնել էին, որ Թրամփի նախընտրական քարոզարշավով զբաղվողները մինչ 2016թ. կայացած ընտրությունները քանիցս կապ են հաստատել ռուսական հետախուզության բարձրաստիճան պաշտոնյաների հետ:

Ռուսաստանի ԱԳՆ-ն ԶԼՄ-ների այդ հրապարակումներն անվանել է ևս մեկ վկայություն այն բանի, որ ԱՄՆ-ում ներքաղաքական խոշոր խաղեր և առուծախ է ընթանում: Կրեմլում, իրենց հերթին, ընդգծել են, որ այդ հաղորդագրությունները փաստական հիմքեր չունեն:

Շաբաթվա սկզբին իր պաշտոնը թողել է ԱՄՆ նախագահի ազգային անվտանգության հարցերով խորհրդական Մայքլ Ֆլինը: Նա խոստովանել է, որ Սպիտակ տանը տրամադրել է ոչ ամբողջական տեղեկատվություն Ռուսաստանի դեսպան Սերգեյ Կիսլյակի հետ  կապերի մասին:

ԶԼՄ-ները հաղորդել են, որ Ֆլինը 2016-ի դեկտեմբերին Կիսլյակի հետ քննարկել է հակառուսական պատժամիջոցները՝ չնայած այն բանին, որ Թրամփի կողմից այդ մասին հերքվել էր: ՌԴ նախագահի մամուլի քարտուղար Դմիտրի Պեսկովը հաստատել էր խոսակցության մասին լուրը՝ ընդգծելով, որ նրանց զրույցը ճիշտ չի փոխանցվել: