Հայաստանը ՀՀԿ-ի համար նեղ է

Ազգային ժողովի ընտրություններին ընդառաջ ընտրատարածքներում ՀՀԿ-ն դուրս է եկել ՀՀԿ-ի դեմ, իսկ ո՞վ կհաղթի։ Իհարկե, պատգամավորության թեկնածուները կցանկանային խուսափել նման իրավիճակից, երբ չեն կարող տարածքը բաժանել, սակայն այլ ելք չկա։

Ինչպես Հայաստանը, այնպես էլ Երևանը բաժանված է տարբեր կլանների, խմբավորումների, հեղինակությունների միջև։ Մինչև երեկ-մյուս օրն ամեն ինչ հստակ էր․ բոլորը գիտեին իրենց չափը, տեղը և սահմանը, սակայն այս ընտրությունները յուրահատուկ են նրանով, որ սահմանները խախտվել են։ Եվ սա այն խնդիրը չէ, որ կկարողանա լուծել Սերժ Սարգսյանը։ ՀՀԿ-ն ուռճացվել է, մեծահարուստները՝ քառապատկվել այս ընթացքում, բոլորի ախորժակը բացվել է:

Բոլորի համար ՀՀԿ ղեկավարը կանաչ լույս է վառել՝ փորձեք։

Դե ՀՀԿ-ականները փորձում են, ասում են՝ տնետուն ընկած ձայներ են հավաքագրում․ ամեն դեպքում։ Շատերն են հիշում, որ փող բաժանելուց հետո էլ փողերին համապատասխան ձայներ չկային, և դրա համար մարդիկ պատասխան տվեցին, իսկ ոմանք էլ ընտրություններից հետո տասնյակ հազարավոր դոլարներ տուն տարան։ Եվ որպեսզի չկրկնվի նախորդ իրավիճակը, տնետուն անցնելով, անձնագրերի տվյալները հավաքագրելով՝ թեկնածուները փորձում են իրենց ապահովագրել։ Թե ինչ կստացվի՝ կտեսնենք։

Բայց թե ինչպես է լուծվելու մեկ ընտրատարածքում մի քանի խոշոր ՀՀԿ-ականի թեկնածության հարցը, սա արդեն լուրջ խնդիր է ոչ միայն թեկնածուների համար։

Հիշենք, թե ինչ տեղի ունեցավ, երբ Էջմիածինը քաղաքապետ էր ընտրում․ իսկական մարտաֆիլմ։

Եթե ընտրատարածքը չկարողանան բաժանել, շատ խելք պետք չէ հասկանալու համար, որ նման իրավիճակից խուսափելն անհնար կլինի, հատկապես՝ ընտրատարածքներ կան, որտեղ թշնամիներն են առաջադրվել միմյանց դեմ։

ԱԺ-ում մեկ հատիկ աթոռի համար մեծահարուստները պատրաստ են միմյանց կոկորդ կրծելու։ Իհարկե, այս ամենը զավեշտալի կլիներ, եթե ողբերգական չլիներ։

Ազգային ժողով, այն է՝ ժողովրդին ներկայացնելու են մարդիկ, ովքեր մինչև կոկորդը թաթախված են կաշառակերության, փողեր լվանալու, օֆշորային սկանդալների, մսխումների և միայն իրենց հայտնի հանցագործությունների մեջ, ավելին՝ նրանք պայքարելու են յուրաքանչյուր ձայնի համար՝ ԱԺ հասնելու համար։

Եթե երկրում գեթ մեկ մարդ կա, ով մտածում է, որ կլինեն փոփոխություններ կամ որակական բարեփոխումներ, ապա լավ կլինի ամպերից իջնեն․ երկրում գործում է հստակ կանոնակարգ․ չզարգանալ, չզարգացնել, ժողովրդին թողնել աղքատության մեջ, թալանել երկիրը: Առաջիկայում այս կանոնները չեն փոխվելու։ Սակայն այդ կանոններից օգտվողների քանակն է ավելացել, այնպես որ՝ մի կտոր տարածքի համար ՀՀԿ-ն կպայքարի անգամ ՀՀԿ-ի դեմ։

Իսկ ինչ է պետք այդ զանգվածին ԱԺ հասցնելու համար. երևի թե պետք է տարածքներն ավելացնել, հիմնել գյուղեր ու քաղաքներ, մտածել ժողովրդագրության աճի մասին և բոլոր ՀՀԿ-ականներն ԱԺ-ում տեղ կունենան, ոչ թե միմյանց կոկորդ կկրծեն։ Ուստի՝ օն անդր առաջ, ավելացնելու Հայաստանի սահմանները․ սա է ՀՀԿ-ի հաղթանակի լավագույն լուծումը՝ ուզեն, թե չուզեն…

NEWSPRESS.am