Արթուն պահելով ընթերցողին՝ նոր սերնդի մեջ

Հովհաննես Թումանյանի ծննդյան և «Գիրք նվիրելու» տոնի առթիվ Երևանի Րաֆֆու անվան թիվ 36 հիմնական դպրոցի աշակերտներն այցելեցին կրթօջախի հարևանությամբ գործող, Արաբկիրի թիվ 23 նախադպրոցական ուսումնական հաստատություն:

Ավագ խմբերի սաները՝ դաստիարակ Լիլյա Մելքոնյանի օգնությամբ, հարցուպատասխանի, հանելուկների և գեղեցիկ ոտանավորների միջոցով դպրոցականներին ներկայացրեցին այն ամենն, ինչ գիտեն Թումանյանի ու գրքերի մասին:

Դպրոցի 3-րդ և 4-րդ դասարանի աշակերտներն էլ անպատրաստ չէին: Նրանց մեծ մասը դաստիարակվել ու իր առաջին ուսումն ստացել էր հենց այս մանկապարտեզում: Այնպես որ աշակերտները ամենայն պատասխանատվությամբ էին մոտեցել խնդրին ու իրենց առաջին մանկավարժներին ներկայացել հավուր պատշաճի:

Դպրոցականները նկատեցին, որ շատ-շատերն են գրքի հետ ծանոթացել ու մտերմացել թումանյանական հեքիաթներով, մանկական բանաստեղծություններով, քառյակներով ու պոեմներով:

Նրանք նշեցին նաև, որ «Գիրք նվիրելու» տոնը բազմախորհուրդ է. մի կողմից այն պարտավորեցնում է ճանաչել գրքի արժեքն ու արթուն պահել մարդու մեջ ընթերցողին: Մյուս կողմից՝ գիրք նվիրել, նշանակում է՝ նվիրել միմյանց հոգևոր հաղորդակցման հաճելի ու անմոռաց պահեր:

Ու քանի որ օրվա խորհուրդը գիրք նվիրելն էր, ուստի մանկապարտեզի սաներն իրենց ավագ ընկերներից ստացան նվեր գրքեր:

Իսկ մանկական հիմնարկի նախկին սաներից մեկը, իր առաջին կրթօջախին նվիրեց իր իսկ ձեռքով պատրաստված հաստափոր գիրք-հուշանվեր, որը նա հանձնեց մանկապարտեզի տնօրեն Աստղիկ Հովիկյանին:

Արմինե Մկրտումյան