«Երդվելիս ես զգացի զինվորական կոչվելու ողջ պատասխանատվությունը». նորակոչիկ

Ազգային բանակի զորամասերը համալրվեցին երիտասարդ զինվորներով: Հունվարի զորակոչն արդեն ավարտվեց: ՊՆ 3-րդ բանակային կորպուսի N զորամասում տեղի ունեցավ նորակոչիկների երդման հանդիսավոր արարողություն, որից հետո նրանք կզբաղեցնեն մարտական ստորաբաժանումներից զորացրված զինվորների տեղերը։

Տեքստ

Տղամարդը կյանքում երդվում է մեկ անգամ, և դա տեղի է ունենում բանակում: Հայրենիքին անձնվիրաբար ծառայելու երդման խոսքով ու ստորագրությամբ էլ՝ Վանաձորի Սուրբ Սարգիս եկեղեցու բակում իրենց ծառայությունը հաստատեցին 3-րդ բանակային կորպուսի Կարո Հողմրցյանի հրամանատարության տակ գտնվող N զորամասի նորակոչիկները:

Հանդիսավոր տողանի կանգնած զորամասի անձնակազմի և երիտասարդ զինվորների բազմաթիվ հարազատների ներկայությամբ շարային քայլքով շարահրապարակ բերեցին մարտական դրոշը, որի ներքո էլ հնչեց զինվորական երդումը:

Նորակոչիկներն իրենց կյանքում առաջին անգամ արեցին ամենապատասխանատու երդմնակալությունը, որից հետո Գուգարաց թեմի առաջնորդի հետ միասին նրանք աղոթեցին՝ խաղաղ ծառայության համար:

Այնուհետև, հրամանատարի թույլտվությամբ, նորակոչիկների հարազատները մոտենում և լուսանկարում էին իրենց զավակների հետ՝ հավերժացնելով նրանց կյանքի, թերևս, ամենանշանակալի իրադարձության պահը:

Զինվորների երդման արարողություն տեղի ունեցավ նաև Վանաձորի Կոտրած եկեղեցու բակում: 3-րդ բանակային կորպուսի N զորամասի անձնակազմի հետ տարվող աշխատանքների գծով տեղակալ, մայոր Արմեն Սարգսյանը ողջունեց և շնորհավորեց անձնակազմին ու նորակոչիկներին, որից հետո սկսվեց բուն երդման արարողությունը։

Մայորը նորակոչիկներին ևս մեկ անգամ մաղթելով խաղաղ ծառայություն՝ իր խոսքում նշեց, որ երդվելով՝ նրանք պատասխանատու եք դառնում մեր պետության սահմանների անձեռնմխելիության, ժողովրդի անվտանգության, խաղաղ գոյության համար: Արարողությունը եզրափակվեց զորամասի անձնակազմի հանդիսավոր երթով, երգով։ NEWSPRESS.am-ի հետ զրույցում զինվորներից մեկն ասաց. «Երդվելիս ես զգացի զինվորական կոչվելու ողջ պատասխանատվությունը»:

Իսկ արդեն զորամասի ճաշարանում բոլոր զինվորները մասնակցեցին Վանաձորի քաղաքապետարանի և զորամասի համատեղ պատրաստած անակնկալին՝ տոնակատարություն՝ «Հորովել» երգի պարի համույթի մասնակցությամբ: Տոնակատարության ընթացքում իրենց երգերով հանդես եկան նաև զինվորները: