Եթե քաղաքացին բողոք չունի, որ ընտրակաշառք է վերցերել՝ չես կարող փաստել. Շարմազանով

Ոչ միայն Լոռու մարզում, այլ մնացած 13 ընտրատարածքներում ՀՀԿ թեկնածուներն ամենամրցունակն են և ամենահայտնին են ու նաև ժողովրդականություն վայելողները՝ դա ցույց կտան նաև ապրիլի 2-ի ընտրությունները:

Այս մասին այսօր՝ ՀՀԿ Գործադիր մարմնի նիստից հետո լրագրողների հետ զրույցում ասաց ՀՀԿ խոսնակ Էդուարդ Շարմազանովը:

«Մենք այլևս մեծամասնական ընտրակարգ չունենք, դա համամասնական ընտրություն է, ուստի մենք նախ պետք է ընտրենք կուսակցությանը»,- նշեց ՀՀԿ խոսնակը:

Ինչ վերաբերում է իր ծննդավայրին՝ Լոռիին, ապա նկատեց, որ այստեղ կան 4-5 մրցունակ գործիչներ, որոնք կարող են ճիշտ քարոզարշավի դեպքում լուրջ հաջողություններ ունենալ:

«Կոնկրետ ես ո՞ւմ կքվեարկեմ. Ես քվեարկելու եմ ՀՀԿ-ի օգտին և առանց բացառության օժանդակելու եմ Լոռու մարզում առաջադրված իմ բոլոր ընկերներին»,- նշեց Շարմազանովը:

Ինչ վերաբերվում է ընտրակաշառքներին, ապա Շարմազանովը նկատեց, որ ինքն ու իրենց թիմը այս երևույթին բացասաբար են վերաբերվում:

«Մենք ունենք շատ հստակ հանձնարարական՝ իրականացնել բացառապես օրենքի սահմանում քարոզարշավ: Լրատվամիջոցները շատ բան են գրում. միգուցե մի մասը ճիշտ է, մի մասը իրականության հետ կապ չունի: Ես կոնկրետ փաստեր չունեմ: Ինչ մնում է լսելուն, ես էլ կարող է լսեմ, որ այս կամ այն ուժը ընտրակաշառք է բաժանել: Բայց դա այնպիսի բան է, որ եթե քաղաքացին բողոք չունի, որ ընտրակաշառք է վերցերել՝ չես կարող հաստատել»,-ասաց Շարմազանովը:

Նա մի կողմից նկատեց, որ ընտրություններից դեռ 2 ամիս առաջ ընտրակաշառք բաժանելու լուրերը «սենսացիա են», մյուս կողմից էլ նշեց, որ բարձր է գնահատում ժողովրդի, հասարակության գիտակցության մակարդակը: