Միջազգային IPI լրատվական կազմակերպության խորհրդի անդամ, NEWSPRESS.am-ի հիմնադիր Արիանա Հովսեփյանի դիմում-բողոքը՝ Գլխավոր դատախազ Արթուր Դավթյանին

ՀՀ գլխավորի դատախազ պարոն Ա. Դավթյանին

IPI (Միջազգային Մեդիա Ինստիտուտ)

լրատվական կազմակերպության խորհրդի անդամ,

NEWSPRESS.am կայքի հիմնադիր-տնօրեն

Արիանա (Արմենուհի) Հովսեփյանից

Հսց՝ ք. Երևան, Աբովյան 34 շ., բն. 29

Հեռ. 077 16 00 00

Դիմում-բողոք

Հարգելի′ պարոն Դավթյան, իմ վերաբերյալ քրեական գործը գտնվում է ՀՀ քրեական վերաքննիչ դատարանում և քննվում է Վերաքննիչ քրեական դատարանի դատավոր տիկին Մ․ Պետրոսյանի նախագահությամբ։

Հերթական դատական նիստը նշանակված է սույն թվականի մարտի 10-ին։

Ես ղեկավարում եմ NEWSPRESS.am կայքը։ Նշված կայքը գրանցված է հարկային մարմիններում, և օրենքի համաձայն՝ պարտավոր եմ ներկայացնելու համապատասխան հաշվետվություններ։ Նշված գործառույթն իրականացնում եմ իմ անվամբ գրանցված նույնականացման քարտի միջոցով։

Քրեական գործի նախաքննության ընթացքում նախաքննական մարմինն իմ նկատմամբ խափանման միջոց ընտրելիս ինձանից վերցրել է նաև նշված նույնականացման քարտը և իբրև թե կցել է քրեական գործին։ Հարկային պարտավորությունների իրականացումներից պարզվեց, որ նույնականացման քարտի բացակայության պայմաններում չեմ կարող համապատասխան հաշվետվություն ներկայացնել։ Դիմում եմ ներկայացրել նախագահող դատավոր տիկին Պետրոսյանին՝ խնդրելով փոխարինելու իմ նույնականացման քարտն անձնագրիս հետ: Տիկին Պետրոսյանը բավարարել է իմ խնդրանքը, սակայն աշխատակազմից հայտնեցին, որ նույնականացման քարտը քրեական գործերի մեջ չկա։

Խնդրում եմ Ձեզ՝ միջոցներ ձեռնարկել՝ պատասխանատվության ենթարկելու քրեական գործի նկատմամբ հսկողություն իրականացնող դատախազներին, ինչպես նաև վարույթ իրականացնող քննիչին՝ իրենց պաշտոնական անփութության համար, ինչպես նաև միջոցներ ձեռնարկել նույնականացման քարտն ինձ վերադարձնելու, որպեսզի ես կարողանամ խուսափել հնարավոր ֆինանսական վնասներ կրելուց։ Վերջին հաշվով, այդ վնասների առաջացման մեղավորը հանդիսանում են գրագիտության պակաս ունեցող դատախազները և նախաքննական մարմինը։ Վերջիններս պարտավոր էին գիտակցելու իրենց գործողությունների հետևանքները, պարտավոր էին քննության ընթացքում ապահովելու իմ իրավունքների պաշտպանությունը, սակայն վերջիններս օգտվելով իմ՝ օրենքի չիմացությունից, ավելորդ՝ ինձ ոչ հասանելի դժվարություններ են ստեղծել։ Նշածս թերությունները միակը չեն:

Տեղյակ եմ պահում, որ ինչպես իմ, այնպես էլ Նարեկ Երիցյանի վերաբերյալ քրեական գործերի ընթացքում դատախազական և նախաքննական մարմինների կողմից թույլ են տրվել քրեադատավարական իրավանորմերի պահանջների կոպիտ խախտումներ, որոնք հանգեցրել են իրական հանցագործների՝ պատասխանատվությունից խուսափելուն։

Կատարված հանցագործությունները բացահայտելու փոխարեն նախաքննական և դատախազական մարմինները ապօրինի, ոչնչով չհիմնավորված քրեական հետապնդում եմ սանձազերծել իմ նկատմամբ, որով փորձում են անհիմն խոչընդոտներ հարուցել իմ դեմ, որով նպատակ ունեն դադարեցնել իմ լրագրողական գործունեությունը։

Գիտակցում եմ, որ զբաղեցնում եք պատասխանատու պաշտոն, սակայն, ելնելով հարցի կարևորությունից՝ խնդրում եմ թեկուզ կարճ ժամանակով հնարավորություն ընձեռնել անձամբ ներկայանալու Ձեզ և ներկայացնելու այն հիմնական պատճառները, որոնք առիթ են հանդիսացել իմ նկատմամբ ապօրինի քրեական հետապնդում իրականացնելու համար։

Կանխավ շնորհակալ եմ:

IPI (Միջազգային Մեդիա Ինստիտուտ) լրատվական կազմակերպության խորհրդի անդամ,

NEWSPRESS.am կայքի հիմնադիր-տնօրեն Արիանա (Արմենուհի) Հովսեփյան:

Կից ներկայացնում եմ վերաքննիչ բողոքի և անձնագրիս պատճենները: