Սերժ Սարգսյանը ջունգլիների օրենք է մտցրել մրցապայքարում. պետք է իրար կոկորդ կրծեն

Այն, որ ապագա խորհրդարանում հայտնվելու համար ընտրապայքար էր լինելու մրցակից ուժերի միջև, թերևս նորմալ է դիտվում: Այսօր, սակայն, պայքարը ոչ միայն «հակառակորդ» ուժերի միջև է, այլև այդ ուժերի ներսում:

Քաղաքական վերլուծաբան Ստյոպա Սաֆարյանը նման զարգացումներ ակնկալում էր:

Նա NEWSPRESS.am-ի հետ զրույցում նշեց, որ եթե այդ ուժերը քաղաքական լինեին, ապա նրանց ներսում քաղաքական պայքար կգնար, ոչ թե իրար «կոկորդ կկրծեին»:

«Հիմա մենք էլ ունենք, չէ՞, ռեյտինգայիններում մրցակիցներ, բայց հաստատ մեկը մյուսի հետ նման խնդիրներ չի ունենում, ու որոշ տարածքներում որևէ մեկն իրեն չի ստորադասում մյուսներին: Բայց էդ թիմերում մարդիկ իրար փոր են ճղում»,- նկատում է «Ազատ դեմոկրատների» համամասնական ցուցակով առաջադրված պատգամավորի թեկնածու Սաֆարյանը:

Նրա դիտարկմամբ՝ իրենք հասկանում են, որ թիմով են աշխատելու, և պետք է խորհրդարան անցնի թիմը: Նա, ով քանակական առումով ավելի մեծ թվեր կբերի:

«Այդ կուսակցությունները քաղաքական չեն, նրանք քաղաքական ու գաղափարական հարցեր չունեն քննարկելու իրար հետ, բնականաբար, պետք է իրար կոկորդ կրծեն… Էնպես չի, որ նրանք բավարարվելու են՝ իրենք իրենց մեջ կռվելով: Այս կտրվածքով իրավիճակը և՛ սպասելի էր, և՛ մտահոգիչ»,- նշում է քաղաքագետը:

Նա, սակայն, այս ամենի մեջ մի լավ բան է տեսնում. նախագահ Սարգսյանը Սահմանադրությամբ այնպիսի կետ դրեց, ըստ որի՝ ով կարողանա իսկապես ժողովրդի քվեն բերել՝  նա էլ կհայտնվի խորհրդարանում: Ստյոպա Սաֆարյանը նկատում է, որ այս կետը գործում է նաև Սարգսյանի թիմի համար: Այլ բան է, որ նախագահը չի վերահսկում այդ մրցապայքարը, որտեղ ներառվել են մարդիկ, ովքեր ժողովրդի քվեն ուրիշ եղանակներով են փորձում ապահովել:

«Արհեստականորեն նախկին համակարգով «թաղ նայողներ» էին բուծել և կարգել ժողովրդի գլխին: Նրանց օգտին մշտապես աշխատում էր մի ամբողջ պետական ապարատ, նրանք ուղղակի լիդեր էին հռչակվում իշխանության կողմից՝ առանց արժանիք ունենալու: Հիմա Սերժ Սարգսյանը ջունգլիների օրենք է մտցրել մրցապայքարում. ով ուժեղ է, թող նա հաղթի»,- ընդգծում է Սաֆարյանը:

Միևնույն ժամանակ, Ստյոպա Սաֆարյանը նկատում է՝ մեծ հաշվով ընտրությունը ժողովրդից է կախված. «Ժողովուրդը պետք է մտածի՝ ուզո՞ւմ է կենդանական աշխարհի բնազդներով, բիլակներով ուժեղ մարդու ընտրի… Կա′մ ընտրում է մեր տեսակին, կա′մ էդ տեսակին»: