Բաց նամակ՝ Ս. Սարգսյանին, Գ. Սահակյանին, Կ. Կարապետյանին, Վլ. Գասպարյանին, պատգամավորներին

Ազգագրագետ Հրանուշ Խառատյանը ֆեյսբուքյան իր էջում գրել է.

«Ո՞վ կմիանա

Բաց նամակ-դիմում ՀՀ նախագահ Ս.Սարգսյանին, ԱԺ նախագահ Գ.Սահակյանին, վարչապետ Կ.Կարապետյանին, ոստիկանապետ Վ.Գասպարյանին, ԱԺ պատգամավորներին

Հայաստանի հասարակությանը «Հաց բերողը» անունով լայնորեն հայտնի Արթուր Սարգսյանը երկրորդ անգամ կալանքի տակ է առնված: Մի շարք հիվանդություններ ունեցող Արթուր Սարգսյանը, որքան հայտնի է հանրությանը, հասարակության համար վտանգ չի ներկայացնում, ձերբակալության պատճառ հանդիսացած նրա արարքը՝ 2016թ. հուլիսին ՊՊԾ գնդում փակված ապստամբներին ուտելիք տանելը, ինչը առիթ է հանդիսացել նրան «Հաց բերող» անվանելու, եթե նույնիսկ իրավական նորմերի շրջանցում է (?), որակապես մարդասիրական արարք է եղել, որի ընթացքում վտանգի է ենթարկվել միայն նրա սեփական կյանքն ու առանց այն էլ վատ առողջությունը:

Հանրությանը հայտնի տեղեկություններով այդ արարքը կատարելիս Արթուր Սարգսյանը զինված չի եղել, չի պատրաստվել որևէ մեկի նկատմամբ բռնություն գործադրել և փաստացի էլ որևէ բռնություն չի գործադրել: Որևէ հստակ ապացույց չկա, որ Արթուր Սարգսյանը խուսափում է իրավական պատասխանատվությունից և ազատ լինելով կարող է խոչընդոտել արդարադատության ընթացքին: Փոխարենն ակնհայտ է, որ կալանքի տակ գտնվող և հացադուլ հայտարարած Արթուր Սարգսյանի կյանքը վտանգի տակ է: Այդ մարդու մահը հաստատ չի նպաստելու արդարադատության իրացմանը, իսկ ապրելը կարող է նպաստել: Միաժամանակ կալանքի տակ գտնվող Արթուր Սարգսյանի տառապանքները խորապես հուզում են հասարակության շատ անդամների՝ ավելացնելով դատական մարմինների գործողություններն արդարադատություն ընկալելու կասկածները և պատժիչ մարմիններ համարելու ընկալումը: Խնդրում, առաջարկում, կոչ ենք անում հասարակության լայն շրջանակներին հուզող այս կոնկրետ դեպքում մարդասիրություն ցուցաբերել, ազատել Արթուր Սարգսյանին կալանքից, հնարավորություն տալ նրան ապրելու իր տանը և գուցե նաև արդարադատության իրացմանը նպաստելու»: