Մարտին Հայաստանում տնտեսական բում է սպասվում

Այս օրերին շատ է խոսվում ընտրակաշառքի մասին. այն սկսվում է 10 հազար դրամից մինչև 100 դոլար: Իհարկե, սա այն ոլորտը չէ, որ բացահայտվի կամ դիմեն ոստիկանություն, սակայն ընտրությունից ընտրություն կայուն եկամուտ է ապահովում:

Թերևս չեն հաշվարկել, թե նախընտրական շրջանում պատգամավորության ոչ աղքատ թեկնածուները որքան գումար են ծախսում նախընտրական գործընթացի վրա. եթե արտերկրում այն ծախսվում է քարոզարշավի և այլնի վրա, ապա Հայաստանում՝ կայուն կերպով հիմնականում ընտրակաշառքի:

Նախ դրական կողմեր ունի ընտրակաշառքը, և պետք չէ միայն բացասականը փնտրել ընտրակաշառքի մեջ: Այս օրերին մարդիկ գնում են խանութ՝ ոչ միայն հաց և սուրճ գնելու, նաև այլևայլ իրեր գնելու հնարավորություն ունեն: Այնպես որ՝ նախընտրական շրջանում Հայաստանում տնտեսական աճն ապահովված է:

Սրանով ընտրակաշառքը ջուր է լցնում վարչապետի և ոչ միայն վարչապետի ջրաղացին: Միլիոնավոր դոլարների շրջանառությունն ակտիվացնելու է տնտեսությունը, հատկապես՝ առևտուրը, նաև մարդկանց ծակ գրպաններում, մկներից բացի, այլ իրեր, օրինակ` փող է հայտնվելու

Եթե կա փող, ապա բարձրանալու է մարդկանց տրամադրությունը, եթե բարձրանալու է մարդկանց տրամադրությունը` ուրեմն ապահով երկրում ենք ապրում, եթե ապահով երկրում ենք ապրում, ապա կեցցե ՀՀԿ-ն:

Եվ հաճախ են ասում, որ ամեն ինչ վատ է. պարզապես երկրին դրական լույսի ներքո չեն նայում, պարզապես այդ ուրախությունը, տնտեսական աճը, ապահովությունը տևելու է մեկ ամիս` մինչև ապրիլյան ԱԺ ընտրությունները: Սակայն ո՞վ է ասել, որ ամեն ինչ վատ է, նաև լավ է:

Ի դեպ, կանանց բախտը նաև բերելու է, ոչ միայն նախընտրական տնտեսական աճ, նաև կանանց միամսյակ. այն է` տնտեսական աճ, դեռ մի բան էլ ավելին:

Իսկ եթե ընտրություններն ամեն տարի լինեին, ապա ՀՀ վարչապետերը հանգիստ կքնեին. տնտեսությունը կաճեր առանց իրենց կամքի և ցանկության, իսկ քանի դեռ այդ մասին չեն մտածել, բավարարվենք միայն մարտյան տնտեսական աճով:

Միանշանակ է, որ երկիրը վճարելու է և′ մեկամսվա տնտեսական աճի, և′ ուրախության համար:

NEWSPRESS.am