ՀՀԿ-ն հայտնում է ընտրակաշառք բաժանելու ժամանակացույցը

ԱԺ նախագահ Գալուստ Սահակյանն այսօր լրագրողների հետ զրույցում անդրադառնալով ընտրակաշառքներին՝ ասել է, թե այս պահին որևէ մեկն ընտրակաշառք չի կարող տալ: Բայց պատճառն ամենևին էլ այն չէ, որ կա վերահսկողություն, այլ պարզապես այն, որ դեռ քարոզարշավը չի սկսվել:

«Ըստ երևույթին մարդիկ, որոնք պիտի ընտրվեն, հանդիպում են ժողովրդին, տարբեր բաներ են խոստանում։ Բայց այս պահին որևէ մեկն ընտրակաշառք չի կարող տալ, դեռևս քարոզչությունն էլ չի սկսվել»,– ասել է մաեստրոն:

Նրա այս հայտարարությունը ենթադրում է երկուսից մեկը՝ կա′մ Գալուստ Սահակյանը հենց նոր է երկնքից իջել ու տեղյակ չէ, որ Հայաստանում ընտրակաշառքներն սկսում են բաժանել դեռ ընտրությունից ամիսներ առաջ, և կա′մ նա փորձում է շրջանցել հարցը ու լռել այդ մասին (որովհետև ավելի լավ է լռի, քան խոսի):

Մյուս կողմից էլ այս հարցին հանրապետականները թերևս փոխհամաձայնեցված են արձագանքում (սա եզակի դեպքերից է): Նախորդ շաբաթ ՀՀԿ ԳՄ նիստից հետո ԱԺ փոխխոսնակ Էդուարդ Շարմազանովը ևս հայտարարեց.

 «Հնարավոր չէ՝ հիմա որևէ մեկն ընտրակաշառք բաժանի, քանի որ քարոզչությունը դեռ չի սկսվել»:

Ուշագրավ է այն, որ չի քննարկվում, թե ովքեր են այս պահին ընտրակաշառք բաժանողներն, ու չի հերքվում երևույթն ընդհանրապես:

Հանրապետական այրերը կարծես պարզապես հայտարարում են կամ խոստանում, որ նրանք, ովքեր դեռ գումարներ չեն ստացել, թող չմտահոգվեն՝ ընտրակաշառքները բաժանվելու են քարոզարշավն սկսելուն պես: 

NEWSPRESS.am