Նաիրա Զոհրաբյանը Հռոմի պապը չէ. կա անմեղության կանխավարկած

«Եթե կա օրենքի խախտում, եթե կա հանցագործություն, անկախ նրանից, թե ում թիմակիցներն են արել, ունի դա քաղաքական դրդապատճառ, թե ոչ, բոլորը պետք է պատժվեն»:

Այսօր Ազգային ժողովում լրագրողների հետ զրույցի ժամանակ ասել է ԱԺ փոխնախագահ էդուարդ Շարմազանովը՝ անդրադառնալով Արարատի մարզի Սայաթ Նովա համայնքում ՀՀԿ անդամի կողմից ԲՀԿ-ականի դանակահարելու մասին լուրերին:

«Ես բացահայտ ասում եմ՝ բոլոր նրանք, ովքեր կփորձեն նախընտրական, քաղաքական պայքարը վերածել բռունցքների պայքարի, խստագույնս կպատժվեն օրենքի ողջ խստությամբ: Կպատժվեն նաև նրանք, ովքեր կփորձեն ապատեղեկատվություն տարածել»,- ասաց Շարմազանովը:

Նա հավելեց, որ իշխանություններն ամեն ինչ անելու են, որպեսզի ընտրությունները լինեն օրինականության սահմաններում: «Մնացածը իրավապահների խնդիրն է և ձեր, որպեսզի վեր հանեք այդ ամենը: Ես վստահ եմ, որ չկա մի դեպք, որին մեր իրավապահները չարձագանքեն»:

Նա նշեց նաև, որ կա օրենք, կա դատական իշխանություն, իրավապահ մարմիններ, որոնք պետք է զբաղվեն:

«Արդեն որոշել եք, որ Հանրապետական թեկնածո՞ւ է: Մուրադ Մուրադյանը հերքել է, որ իր հետ կապ ունի: Քննություն կվարվի: Կա անմեղության կանխավարկած»,- ասաց Է. Շարմազանովը:

Լրագրողի դիտարկմանը, թե ԲՀԿ խմբակցության ղեկավար Նաիրա Զոհրաբյանն ասում է, որ …, ՀՀԿ-կան գործիչը պատասխանեց. «Նաիրա Զոհրաբյանը Հռոմի պապը չէ, որ ինչ ասի, մենք ընդունենք: Նաիրա Զոհրաբյանը հարգարժան գործընկեր է, արտահայտել է իր կարծիքը: Իրավապահ մարմիններն էլ կասեն»: