Բակային մորթը կարգելվի․ կգործեն սպանդանոցները

Այսօր կառավարության հերթական նիստին ՀՀ գյուղատնտեսության նախարար Իգնատի Առաքելյանը ներկայացրեց «Պարտադիր սպանդանոցային մորթի կիրառման ոլորտներին և ժամանակացույցին հավանություն տալու մասին» որոշման նախագիծը:

Այսպիսով` սահմանվել է 2017 թվականից սկսած մսի իրացման և գնման գործընթացում պարտադիր սպանդանոցային մորթի փուլային անցում՝ մինչև 2021 թվականն ամբողջովին սպանդանոցային մորթի անցնելու նպատակով: Կիրառման ոլորտները սահմանվել են՝ հաշվի առնելով այդ ոլորտների կարևորությունը՝ պետական գնումներով սպանդանոցային ծագման մսի ձեռքբերում, տեղական սպանդանոցային ծագման մսամթերքի արտադրություն, հանրային սննդի կազմակերպում, տեղական սպանդանոցային ծագման մսի արտահանում, տեղական սպանդանոցային ծագման մսի մանրածախ շուկա, տեղական սպանդանոցային ծագման մսի մեծածախ շուկա:

Հայաստանում ներկայումս գործում է մոտ 30 սպանդանոց, որոնց գերակշիռ մասն ունեն փոքր և միջին արտադրական հզորություն, որոշ սպանդանոցներ ունեն սարքավորումների համալրման, արդիականացման և վերանորոգման կարիք:

Հիշեցնենք, որ սպանդանոցներից 6-ը խորհրդային տարիների կառույցներ են, իսկ մնացածները կառուցվել են հետխորհրդային տարիներին՝ մասնավոր ներդրումների և դրամաշնորհային ծրագրերի արդյունքում:

Սպանդանոցներից 2-ը (Կոտայքի մարզի Զորավան համայնքում և Սյունիքի մարզի Սյունիք համայնքում) կառուցվել են 2012-2013 թթ. (մասնավոր ներդրումների հաշվին), համալրված են արդիական սարքավորումներով և նախատեսված են մուսուլմանական ծիսակարգով մանր եղջերավոր կենդանիների մորթ իրականացնելու համար:

Այստեղ խնդիրն այն է, որ իրոք բակերում մորթը բոլոր իմաստներով անընդունելի է, սակայն կենդանուն տեղափոխել սպանդանոց և ենթարկել մորթի՝ որոշ խնդիրներ է առաջացնելու, արդյոք այսօր սեփականատերը պատրաստ է նման քայլի գնալ։